Nie tudy jajcy skłali
Vyśvietliłasia, što sustrecca paprasiŭ Łukašenka. Heta lje vadu na pijaraŭski młyn Maskvy. Maŭlaŭ, voś cana ŭsim hulam z Eŭropaj: jak prypiakło — adrazu da nas! Kamentar pa vynikach małankavaha vizytu aficyjnaha kiraŭnika ŭ Rasieju.
"Łukašenka ŭ Majendorfie" — hučyć tak, što abyvatal moža padumać: paśla źniaćcia vizavaha tabu biełaruskaha aficyjnaha kiraŭnika zaprasili kudy-niebudź u Niamieččynu. Ale zamak z ekzatyčnaj nazvaj mieścicca pad Maskvoj i naležyć Kiraŭnictvu spraŭ prezydenta RF.
Eksperty napiaredadni hadali: našto taki śpiech, kali cieraz tydzień — najvyšejšaja rada "sajuznaje dziaržavy"? Paśla pieramovaŭ u Majendorfie stała viadoma:
pasiedžańnie najvyšejšaj rady pieraniesienaje na kaniec listapada — pačatak śniežnia. Što jašče raz padkresllivaje: tyja pasiadziełki — rytualnyja, a realnyja pytańni vyrašajucca kielejna, latentna, tet-a-tet.
Vyśvietliłasia, što sustrecca paprasiŭ Łukašenka. Heta lje vadu na pijaraŭski młyn Maskvy. Maŭlaŭ, voś cana ŭsim hulam z Eŭropaj: jak prypiakło — adrazu da nas!
Dyk jaki pažar pahnaŭ biełaruskaha aficyjnaha lidera ŭ Rasieju?
Uradavaje ahienctva z pompaj paviedamiła, što dva prezydenty "abmiarkoŭvajuć prablemy ŭsiaśvietnaj finansavaj architektury". Voś tak i zaśviarbieła raptam u vychodny dzień zładzić akademičnuju dyskusiju!
Asabliva pryšpilna vyhladaje ŭ amplua suśvietnaha finansavaha dojlida siniavokaja respublika z faktyčna jašče saŭkovaj ekanomikaj dy kacinymi ślazami zołatavalutnych rezervaŭ (trochi bolej za čatyry miljardy dalaraŭ).
Možna ŭjavić sabie, jak zataili dychańnie na Ŭoł-strycie, u Mižnarodnym valutnym fondzie dy Eŭrapiejskim centrabanku, čakajučy vynikaŭ dyskusii ŭ Majendorfie :)
Zrešty, tam z paroha stała zrazumieła, u kaho što balić. Hość faktyčna adkrytym tekstam spytaŭsia ŭ Miadźviedzieva: nu i što nam zaraz rabić, kali my tak da vas pryviazanyja?
I ŭ pryvatnaści — trymajem blizu pałovy ZVR u rasiejskich rublach.
Łukašenka patłumačyŭ, čamu tak: ratavalisia ad amerykanskich padkopaŭ, dystancyjavalisia ad dalara, "kali nas pačali presynhavać pa ŭsich kirunkach".
Inačaj kažučy, vyrašyli skłaści jajcy ŭ rasiejski finansavy košyk — a tut takaja niespadzieŭka! Pryjšła biada, adkul nie čakali.
Ci treba razžoŭvać, što ciapierašniaje chistańnie rasiejskich finansaŭ jość damokłavym miačom nad Biełaruśsiu?
Toje, što pałova našych ZVR — u rublach ź dźviuchhałovym arłom (kali heta karektnaja infarmacyja, a nie hiperbała, jakich nie curajecca biełaruski kiraŭnik), stała navinoj navat dla Stanisłava Bahdankieviča: "Raniej było mieniej za tracinu".
Zrešty, na dumku byłoha kiraŭnika Nacbanku,
nam pahražaje nia stolki finansavy, kolki ekanamičny kryzis.
Bo ŭ siniavokaj niama fondavaha rynku, praktyčna adsutničajuć partfelnyja investycyi — karaciej, ratuje mienavita drymučaść tych sferaŭ, što najbolej ciarpiać zaraz na Zachadzie.
A voś ekanamičnaja systema — "hniłaja", kaža Bahdankievič. Jaje chutčej pachavajuć unutranyja, a nie hlabalnyja prablemy. Vylezie bokam nierefarmavanaść.
Razam z tym moj surazmoŭca ličyć, što
abstaviny nie prycisnuli Łukašenku nastolki, kab jon zaraz pajšoŭ na adziny rubiel.
Napiaredadni, jak pamiatajecie, naziralnikaŭ naściarožyła zajava rasiejskaha ministra finansaŭ Kudryna: maŭlaŭ, baki navažylisia "pašyryć supolny plan stvareńnia adzinaj valuty" (!).
Apakaliptyčnych prahnozaŭ — maŭlaŭ, nia siońnia-zaŭtra nam mohuć nakinuć rasiejski rubiel — nie padzialaje i ekanamist Jarasłaŭ Ramančuk. Jon mnie skazaŭ: "Kali inflacyja ŭ Rasiei składaje 15%, a 80% bankaŭ mohuć zbankrutavać, pierachodzić na rasiejski rubiel było b samym biazhłuzdym rašeńniem. I zaraz hetaha nia budzie".
Na jaho dumku, Łukašenka abmiarkoŭvaŭ kompleks balučych dla Biełarusi finansava-ekanamičnych pytańniaŭ: stan płaciežnaha balansu, cana hazu na 2009 hod. "Što da stabilnaści "biełaruskaj madeli", to my bačym tolki viaršyniu ajsberha", — zaznačaje Ramančuk.
"Kali mierkavać pavodle farmalnych makraekanamičnych pakazčykaŭ, to va ŭradu naŭrad ci jość padstavy źviartacca da MVF pa ekstrannuju dapamohu, tym bolej takuju značnuju — dva miljardy dalaraŭ", — kaža ekspert.
Chitrujuć, biaruć na ŭsiaki vypadak? Chočuć raskłaści jajcy pa roznych košykach, kab nia trapić u rasiejskuju kredytnuju pastku? Ci prosta viedajuć pra stan ajčynnaj ekanomiki toje, čaho nia viedajem my?
Darečy, MVF daje kredyty nie za pryhožyja vočki, a pad reformy. Dyk mo' niama licha biez dabra? Ci ŭ hetaj halinie ŭsio taksama abmiažujecca pyłam u vočy zamiežnikam, jak toje adbyłosia ź minułymi "biesprecedentna prazrystymi vybarami"?
Na dumku Ramančuka, finansava-ekanamičnyja prablemy (ad straty rynkaŭ zbytu da krytyčnaj zamiežnaj zapazyčanaści) va ŭvieś rost mohuć paŭstać pierad Łukašenkam akurat pierad nastupnymi prezydenckimi vybarami.
I voś tady Rasieja pastarajecca ŭziać svajo, "pryčym nia tolki łasymi aktyvami, ale i rečami, jakija b zabiaśpiečvali instytucyjnuju pryviazku": adziny rubiel; novaja kanfihuracyja "sajuznaj dziaržavy", pašyranaj za košt rasiejskich satelitak — Abchazii dy Paŭdzionnaj Asiecii, i h.d.
Karaciej, za čaćviorty termin daviadziecca płacić pa vialikim rachunku.
Alaksandar Kłaskoŭski