Simki šerych telefonaŭ pierastanuć pracavać
Rychtujecca novy zakon, pavodle jakoha asabisty numar (IMEI) kožnaha novaha telefona, jaki traplaje na terytoryju Biełarusi, budzie zanosicca ŭ ahulnarespublikanskuju bazu.
U kancy hetaha hoda moža nabyć moc novy zakon, pavodle jakoha simki ŭ «šerych» telefonach prosta nie buduć pracavać. Kali vy nabudziecie mabilny za miažoj i zachočacie, kab jon pracavaŭ u Biełarusi, to za heta daviadziecca zapłacić.
Z pryniaćciem zakonu asabisty numar (IMEI) kožnaha novaha telefonu, jaki traplaje na terytoryju Biełarusi, budzie zanosicca ŭ ahulnarespublikanskuju bazu. Bazaj u svaju čarhu buduć vałodać mabilnyja apieratary. I telefony ź niezarehistravanymi IMEI‑numarami prosta nie buduć absłuhoŭvać.
Novaŭviadzieńnie, kaniečnie ž, nie budzie tyčycca tych telefonaŭ, jakimi ŭžo siońnia karystajucca biełarusy. Adklučać vašuju mabiłku apieratar nie budzie. Adnak kali paśla nabyćcia mocy zakonu vy sami nabyli telefon za miažoj i pryvieźli jaho ŭ Biełaruś, za rehistracyju IMEI‑numara daviadziecca zapłacić. Pra heta paviedamiŭ načalnik adździeła Hienprakuratury pa nahladzie i daznańni Sałaŭdzi Mahamadaŭ
Zakon raźličany pierš za ŭsio na skaračeńnie kolkaści «šerych» telefonaŭ – niezakonna praviezienych praz mytny kantrol i tych, što nie prajšli siertyfikacyju. Novy zakon dapamoža taksama razabracca z prablemaj kradzienych telefonaŭ. Pa słovach Sałaŭdzi Mahamadava, kali vy kupili kradzieny telefon, to jak tolki zrobicie ź jaho pieršy zvanok, u mabilnaha apieratara adrazu vyśviecicca vaš IMEI‑numar.
Što budzie z zamiežnikami, jakija pryjazdžajuć u Biełaruś sa svaimi telefonami i roŭminham, pakul nieviadoma.