Kamisija — aktyvistu, jaki prahałasavaŭ trojčy: Vašy hałasy ŭsio adno nie mahli paŭpłyvać na vyniki hałasavańnia
Aktyvist hramadzianskaha ruchu «Dzieja» Dzianis Kraŭčuk atrymaŭ adkaz ź Minskaj haradskoj kamisii, kudy jaho skarhu pieranakiravaŭ Śledčy kamitet. U kamisii ličać, što «nievykanańnie paradku praviadzieńnia pracedury ŭklučeńnia hramadzianina ŭ śpisy hałasavańnia dadatkova nie mahło paŭpłyvać na vyniki hałasavańnia na vybarčych učastkach», pieradaje źmiest dakumienta TUT.BY.
Fota: Dzianis Kraŭčuk
Nahadajem, aktyvist hramadzianskaha ruchu «Dzieja» Dzianis Kraŭčuk zmoh try razy prahałasavać na roznych učastkach Minska, nie majučy navat staličnaj prapiski. Pierad tym, jak iści hałasavać, małady čałaviek pastaviŭ u pašpart śpiecyjalnuju pamietku «000-179», pra jakuju daviedaŭsia z sacyjalnych sietak. Dzianis vyrašyŭ pravieści ekśpierymient: pastaviŭ sabie ŭ pašpart hetuju adznaku i pajšoŭ hałasavać u škoły i himnazii. U himnazii №4 jamu vydali biuleteń, i jon prahałasavaŭ. Udałosia heta zrabić i ŭ škołach №185 i №201. Uvieś praces jon zdymaŭ na videa.
Minskaja haradskaja vybarčaja kamisija pravieryła fakty, vykładzienyja ŭ skarzie aktyvista. Pavodle jaje źviestak, atrymanych z tłumačalnych, jakija napisali siabry kamisij, na ŭčastku №68 aktyvist atrymaŭ biuleteń paśla pradjaŭleńnia pašparta i dahavora najmu žyłoha pamiaškańnia. Pra toje, što Kraŭčuk prahałasavaŭ i ŭniesieny ŭ dadatkovy śpis hałasavańnia, kamisija apaviaściła jaho ŭčastak u Naračy, dzie jon prapisany.
«Apisanyja dziejańni kamisii nie piarečać vybarčamu zakanadaŭstvu», — havorycca ŭ adkazie.
Jašče na dvuch učastkach №64 i №73 (škoła №185 i №201) Kraŭčuku, jak śćviardžajuć u kamisii, biuleteni vydali paśla pradjaŭleńnia pašparta i słoŭ aktyvista, što jon «faktyčna pražyvaje ŭ hety pieryjad u Minsku». Choć pa zakonie biuleteń jamu mahli vydać tolki paśla dakumientalnaha paćviardžeńnia rehistracyi ŭ akruzie hałasavańnia.
Na dumku kamisii, dadzieny fakt śviedčyć pra «nievykanańni paradku praviadzieńnia pracedury ŭklučeńnia hramadzianina ŭ śpisy hałasavańnia dadatkova».
«Adnak hety fakt nie moh paŭpłyvać na vyniki hałasavańnia na vybarčych učastkach №64 i №73», — ličać u kamisii.
Fota z asabistaha archiva aktyvistaŭ
Kraŭčuk ža ličyć, što svaim adkazam kamisija pryznała fakt parušeńnia.
— Heta raduje. Samaje cikavaje toje, što ja nibyta ŭ dvuch vypadkach «uprasiŭ» členaŭ kamisii vydać mnie biuleteń! Jakija «čullivyja» našy žančyny z vybarčych kamisij, — kaža Dzianis Kraŭčuk. — Na maim videa vyrazna bačna, što ja nikoha nie prasiŭ unieści mianie ŭ dadatkovy śpis! U škole №201 siabry kamisii ničoha nie zmahli mnie adkazać na pytańnie pra toje, jakim čynam mnie vydali biuleteń. Heta nie adkaz, a adpiska. Pakarańnie, jak možna zrazumieć z adkazu kamisii, nichto nie paniasie. Heta prosta poŭnaje biazładździe. Płanuju razam z pravaabaroncami skłaści i nakiravać u SK jašče adnu skarhu.
Zajavu i videa, padadzienyja ŭ milicyju kandydatam u deputaty, aktyvistam ruchu «Za Svabodu» Mikitam Siemianienkam, RUUS pierasłaŭ u Frunzienskuju vybarčuju kamisiju. Adtul pryjšoŭ adkaz.
Fota z asabistaha archiva aktyvistaŭ
Na dumku staršyni kamisii Zinaidy Žahołkinaj, vybarčy praces na ŭsich nazvanych učastkach prachodziŭ «u poŭnaj adpaviednaści z artykułam 52 Vybarčaha kodeksa: biuleteni vydavalisia na padstavie śpisu hramadzian, jakija majuć prava ŭdzielničać u vybarach, paśla pradjaŭleńnia pašparta ci inšaha dakumienta».
«Dadzienaja infarmacyja paćvierdžana naziralnikami palityčnych partyj i hramadskich arhanizacyj», — ličyć staršynia kamisii Zinaida Žahołkina.