Natchnialnaja pramova najlepšaj aktrysy «Oskara» Frensis MakDormand: «Chaču, kab sa mnoj stajali ŭsie žančyny-naminantki»
Mnohija kinakrytyki byli ŭpeŭnienyja, što mienavita film «Try biłbordy» voźmie hałoŭny «Oskar», ale najlepšaj kinastužkaj pryznali «Formu vady» Hiljerma del Tora.
Zatoje statuetku jak najlepšaja aktrysa atrymała niepaŭtornaja Frensis MakDormand za hałoŭnuju rolu ŭ «Troch biłbordach na miažy Ebinha, Misury».
Frensis MakDormand viadomaja taksama pa rolach u stužkach «Paśla pračytańnia spalić», «Amal znakamity» i «Farho».
Pra toje, što aktrysa sapraŭdy ŭnikalnaja, śviedčyć i jaje pramova na ŭručeńni ŭznaharody.
Jana pastaviła svaju załatuju statuetku na scenu, pahładziła jaje i skazała: «Kali mnie vypaŭ taki honar, ja b chacieła, kab usie žančyny-kandydaty ŭ kožnaj katehoryi stajali sa mnoj siońnia ŭviečary. Kinarežysiory, pradziusary, režysiory, piśmieńniki, kiniematahrafisty, kampazitary, dyzajniery!».
Paśla prośby Frensis žančyny-naminantki padnialisia sa svaich miescaŭ, a jana praciahnuła. «Pahladzicie navokał, łedzi i džentlmieny. Va ŭsich nas jość historyi, jakija my možam raskazać, prajekty, jakija treba finansavać. Nie kažycie pra heta z nami na viečarynie siońnia, zaprasicie nas u svaje ofisy praz paru dzion, ci prychodźcie ŭ našy, i my raskažam vam pra ich. Sychodziačy sa sceny, ja chaču skazać dva słovy — inclusion rider (abaviazak najmać kamandu ŭ adpaviednaści z pryncypami rasavaj i hiendarnaj roŭnaści — Red.)», — dadała Makdormand.