Maradona vačyma Kusturycy
Boh futbolnaha karnavału
Lavacki karnavał i arhientyskaje stodapakłanieńnie.
Bałkanski režyser Emir Kusturyca zrabiŭ kinapartret słynnaha arhientynskaha futbalista Dyjeha Maradony. Kusturyca zdaŭna źjaŭlajecca jahonym fanatam…
Ale dakumentalnaja stužka Maradony-Kusturycy – heta nia prosta partret. Heta niastrymany karnavał, jaki tak lubić Kusturyca ŭ svaich filmach. A Dyjeha Maradona – boh futbolnaha karnavału.
Karnavał – jość hratesk, parušeńnie miežaŭ, kulbity, kali vierch i niz mianiajucca miescami, a ślozy viančajucca z rohatam. Ź lohkaj ruki filozafa Michaiła Bachcina karnavał uchvalaŭsia, jak prastora svabody, što razburaje surjozny aficyjoz.
Karnavał Maradony – heta hienijalna-šulerskija hały, tryjumf pakryŭdžanych (Treciaha śvietu) nad kryŭdnikami (złosnaja karaleŭskaja Anhlija i Ameryka), vybuchovaje lavactva, antybušaŭskija sakołki, siabroŭstva ź Fidelem Kastra i Uha Čavesam.
Kusturyca dadaje svaje vynachodki – tanha, vynajdzienaje ŭ bardeli i matč Maradony, śpievy futbolnaje zorki pra kakain – i ŭryŭki ź filmaŭ bałkanskaha metra, jakija byccam naŭmysna zdymalisia, kab prailustravać žyćcio Maradony. “Arystakratyzm biednaści” – abviaščaje Kusturyca.
U filmie – demanstracyi suprać Ameryki, kaktejl Mołatava – i Dyjeha Maradona-mulciaška, ad jakoha dastajecca Marharet Tetčer, Rejhanu, Błeru j Bušu.
Kusturyca pjany ad lavackaha karnavału, i nie ŭzhadvaje hierojaŭ svajho “Padpolla”, jakija pieraŭtvaryli lavacka-partyzanskaje žyćcio ŭ piekła z čyrvonym karnavałam rastrełaŭ.
Karnavał nie zaŭždy – svaboda. Počastu – heta bunt i vyklik niabiosam. Dyjeha Maradona ŭ filmie nia prosta čałaviek – jon boh, falšyvy stod i zorka dla biednych. Fanaty stvaryli carkvu Maradony, molacca jamu j klanucca jahonym imiom. Maładyja ženiacca pad ałtarom Maradony, niaviesta ŭ karunkavym velumie haniaje miač.
Karnavał źmiešvaje bluźnierstva i śviataść.
Hiedanist Kusturyca dabliziŭsia da bluźnierstva, kab razam ź siabram Dyjeham praśpiavać pra śviataść žyćcia.