Novyja kumiry
Kaliści ŭ malenstvie mnie zdavałasia, što žyćcio budzie pražytaje nie darma, kali pabaču Del Pjera. Voś pabačyŭ. Ale zachapili zusim inšyja hulcy, svaje, biełaruskija. Piša Źmicier Pankaviec.
U aŭtorak pierad futbołam žartavaŭ, što žyćcio budzie pražytaje nie darma, kali pabaču samoha Del Pjera, kolišniaha kumira dziacinstva. Słavutaha italjanca pabačyŭ, ale zachapili zusim inšyja hulcy, svaje, biełaruskija. Piša Źmicier Pankaviec.
Alesandra Del Pjera byŭ kumiram jašče ŭ tyja dziciačyja hady, kali my haniali futbolny miač na viaskovym vyhanie. Tady z zamirańniem serca my sačyli za Lihaj čempijonaŭ i pieršynstvami śvietu i Eŭropy. Viali sšytki, dzie paznačali vyniki hulniaŭ, źbirali nalepki z vyjavami najlepšych hulcoŭ śvietu, chacieli być padobnymi da ich.
Našymi kumirami byli Klinsman, Kiopkie, Zamer, Šyrer, Šerynhiem, Veron, Batystuta, Klujvert, Zejedorf, Ravaneli, Vijali, Maldzini, Badža, Ramaryjo, Dunha, Stoičkaŭ, braty Łaŭdrupy, Šmejchiel, Zydan, Džarkajeff, Bartez, Fihu i, naturalna, Del Pjera.
Hety nievysoki italjaniec užo nia prosta adzin z mnohich, jon uvasableńnie epochi.Del Pjera vyjhravaŭ Lihu čempijonaŭ, dva hady nazad u składzie «Skuadry adzury» staŭ čempijonam śvietu. Jon zabivaŭ dziasiatki hałoŭ roznym kamandam. Del Pjera praz usiu karjeru zastaŭsia viernym «Juventusu», navat kali kamandu sasłali za karupcyjny skandał u Seryju B. Majki ź jahonym proźviščam nasili i nosiać va ŭsim śviecie, u tym liku ŭ Biełarusi.
Navat u dziacinstvie my, napeŭna, nia vieryli, što biełaruski klub niekali zmoža vyjści ŭ hrupavy etap Lihi čempijonaŭ, pryvieści ŭ krainu takija kamandy, jak «Reał» i «Juventus». Heta vyhladała absalutna nierealna, a ŭsie słovy Anatola Kapskaha ŭsprymalisia ź vializnaj dolaj skieptycyzmu.
Tamu hulnia na «Dynama» 30 vieraśnia — heta jak dakranucca da kazki, spraŭdzić svaju kolišniuju maru. Nia važna ŭžo ź jakim likam syhrajuć kluby, važny sam fakt prysutnaści na hetym śviacie futbołu. Pryznacca, kali pierad pačatkam hulni zahučaŭ himn lihi čempijonaŭ, to ciełu prabiehlisia dryžyki.
Dziakujučy BATE, u krainie pačaŭsia futbolny bum.Ludzi z nočy zajmali čerhi la kasaŭ stadyjonu, kab dabyć zapavietny kvitok na hulniu. Na stadyjonie faktyčna nie było volnych miescaŭ, i padtrymka była naležnaja. Zrešty, ni dla koha nie sakret, što ludzi išli na futboł pieražyvać za BATE, ale hladzieć na «Juventus».
Jak ža niečakana było, što ŭžo ź pieršych chvilin barysaŭcy pačali dziejničać pieršym numaram. Nie adbivacca ad atak apenincaŭ, a šukać ščaście ŭ čužych varot. Spačatku Radzivonaŭ nia zmoh skarystać vychad adzin na adzin z bramnikam, ale ŭžo praź niejki dziesiatak chvilin Siarhiej Kryviec paśla bliskučaj pieradačy Dźmitryja Lichtaroviča abyhraŭ Maninhiera i nakiravaŭ miač u pustyja varoty. Stadyjon šaleŭ. Pieršy biełaruski hoł u Lizie čempijonaŭ!
Nu a kali Ihar Stasievič pierajhraŭ u pavietry samoha Paŭła Nedveda i padvoiŭ lik, to pačałosia rabicca niešta niejmaviernaje! Uvohule, skłałasia ŭražańnie, što ŭ toj viečar u krainie nie było abyjakavych da futbołu ludziej. Akurat takija rečy i zdolnyja hurtavać nacyju.
«Juventus» na toje i «Juventus», što nie papłyŭ pa ciačeńni, a zmoh pierałamić chod pajadynku i lik zraŭniać. Ničyja, naturalna, pryniesła bolš radaści, čym rasčaravańnia, ale niedzie padśviadoma zasieła dumka, što mahli i pieramahčy.
Na paślamatčavaj pres‑kanferencyi hałoŭny trener BATE na emocyjach vyhavaryŭsia pra ŭsiu, što balić.Jon narakaŭ na ajčynnych žurnalistaŭ, jakija pierad hulnioj nie nadzialali jahonaj kamandzie nijakaj uvahi, a ŭsia ich uvaha była skancentravana na słavutych haściach. «My viedajem usie pra Del Pjera, Nedveda, ale ničoha nia viedajem pra Radzivonava, Kryŭca, Chahuša…», — z kryŭdaj u hołasie skazaŭ Hančarenka.
Napeŭna, fakt vychadu BATE ŭ hrupavy turnir usio jašče ŭsprymaŭsia ŭsimi nami jak niejki ščaślivy źbieh abstavinaŭ, vypadkovaść. Tamu i ŭvaha našaja najpierš była prykavanaja nie da Niachajčyka i Stasieviča, a da zamiežnych zorak.
Chočacca vieryć, što hulnia ź «Juventusam» kančatkova razburyć takija stereatypy. I ludzi buduć chadzić na stadyjony nie dla taho, kab pabačyć Del Pjera ci niekaha jašče. Chočacca vieryć taksama, što pryjšoŭ čas novych kumiraŭ, i nie adzin ja źbirajusia bližejšym časam kupić majku z proźviščam Siarhieja Kryŭca.
Źmicier Pankaviec
Fota na hałoŭnaj staroncy juventus.com