Za minułyja vychadnyja ŭ DTZ zahinuli 17 čałaviek
U Biełarusi za minułyja vychadnyja ŭ DTZ zahinuli 17 čałaviek, paviedamili va UDAI MUS. Aprača taho, 27 i 28 vieraśnia ŭ 62 DTZ 59 čałaviek atrymali cialesnyja pažkodžańni roznaj stupieni ciažkaści.
Ludzi zahinuli ŭ vyniku troch pierakulvańniaŭ transpartnych srodkaŭ, najezdu na viełasipiedysta, udaru viełasipiedysta hruzam, sutyknieńnia aŭtamabila z hužavaj pavozkaj i dzieviaci najezdaŭ na piešachodaŭ.
Tak, 28 vieraśnia ŭ Navahrudku 55‑hadovy vadziciel, jaki kiravaŭ aŭtamabilem «Opiel», vyjechaŭ na pałasu sustrečnaha ruchu i sutyknuŭsia z hužavaj pavozkaj, jakoj kiravaŭ 73‑hadovy piensijanier. U vyniku pasažyr hužavaj pavozki 1926 hoda naradžeńnia zahinuŭ na miescy DTZ, a piensijanier pamior u balnicy. Vadziciel «Opiela» ź miesca zdareńnia ŭciok, ale byŭ zatrymany ŭ chodzie praviadzieńnia płana «Pierachop».
Jak zaznačyli ŭ DAI, hibieli prachožych možna było paźbiehnuć, kali b jany byli paznačanyja śviatłoadbiŭnymi elemientami. U vioscy Malešaŭ Žytkavickaha rajona Homielskaj vobłaści 24‑hadovy miascovy žychar, jaki kiravaŭ matacykałam biez vadzicielskaha paśviedčańnia, ździejśniŭ najezd na piensijanierku, jakaja nie była paznačana flikierami. Žančyna ad atrymanych traŭmaŭ pamiorła.
Dziaržaŭtainśpiekcyja nahadvaje, što ŭ ciemnacie kožny piešachod, jaki idzie pa darozie, pavinien być paznačany śviatłoadbiŭnymi elemientami. Piešachody, jakija ihnarujuć hetyja patrabavańni PDR, pryciahvajucca da administracyjnaj adkaznaści. U vychadnyja dni za adsutnaść flikieraŭ było aštrafavana 698 čałaviek (štraf składaje da 17,5 tys. rubloŭ).