Na łatvijskaha patrona Alaksieja Dziermana zaviali kryminalnuju spravu za raspalvańnie varažniečy
18 śniežnia Palicyja biaśpieki Łatvii zatrymała žurnalista Juryja Alaksiejeva, jakomu było pradjaŭlena abvinavačańnie ŭ raspalvańni mižnacyjanalnaj varažniečy.
Juryj Alaksiejeŭ. Fota facebook.com.
Juryj Alaksiejeŭ — viadomy prarasijski dziejač Łatvii. Jon źjaŭlajecca zasnavalnikam sajta IMHOclub. Biełaruski filijał «Imchakłaba» ŭznačalvaje publicyst-prapahandyst Alaksiej Dzierman.
Da dziejnaści Juryja Alaksiejeva nieadnarazova cikavaść prajaŭlali śpiecsłužby Łatvii. Isnujuć viersii, što Imhoclub finansujecca z Rasii. Sam Alaksiejeŭ viadomy svaimi vykazvańniami kštałtu: «Va Ukrainie i Łatvii nie isnuje nacyjanalizmu — jość tolki dziki nacyzm».
Taksama Juryj Alaksiejeŭ źjaŭlajecca adnym z zasnavalnikaŭ «Kanhresu niehramadzian». Admietna, što lidar kanhresu Alaksandr Hapanienka niadaŭna taksama paŭstaŭ pierad sudom za raspalvańnie varažniečy.
Što tyčycca Alaksiejeva, to spravu na jaho zaviali za kamientary, u jakich jon zaklikaje «prykončyć usich fašystoŭskich vyradkaŭ», pad jakimi razumiejucca pradstaŭniki łatyšskaj nacyjanalnaści, a ich mova nazvanaja «fašystoŭskaj». U Palicyi biaśpieki zadakumientavana, što kamientary pakidalisia z IP-adrasa, jaki naležyć Alaksiejevu.
Taksama Alaksiejevu pradstavili razdrukoŭku telefonnaj sietki, jakaja pakazvała, što žurnalist znachodziŭsia doma, kali ź jahonaha IP adpraŭlalisia kamientary.
«Padstava zroblena vielmi prafiesijna. Abaraniacca mnie budzie składana — i nakont kamientaroŭ, i nakont patronaŭ», — kaža Alaksiejeŭ u intervju rasijskim vydańniam.
U toj samy dzień u kvatery Alaksiejeva byŭ praviedzieny vobšuk, ciaham jakoha supracoŭniki śpiecsłužbaŭ znajšli dva miašečki z patronami. «Chtości pryjšoŭ da mianie ŭ kvateru i zrabiŭ zakładku», — apraŭdvaŭsia Alaksiejeŭ. Pryčym jon pryznaje, što padčas pieratrusu patrony padkinuć nijak nie mahli. Spravu za zachoŭvańnie patronaŭ pakul nie zavodzili.
Padpisku ab niavyjeździe z Alaksiejeva nie brali, tamu jon zmoh vylecieć u Kaliforniju, dzie žyvie jahonaja dačka i ŭnuki. Razam ź imi jon płanuje adznačyć Kalady i Novy hod. U Ryhu Alaksiejeŭ płanuje viarnucca 7 studzienia.
U ZŠA Alaksiejeva dapytali supracoŭniki FBR u aeraporcie Łas-Viehasa.
Pryjazdžaŭ Juryj Alaksiejeŭ i ŭ Biełaruś, dzie śviaciŭsia ŭ kampanii Alaksieja Dziermana, Piatra Piatroŭskaha, Vadzima Hihina, Valancina Staryčonka i inšych.
Alaksiej Dzierman prakamientavaŭ hetyja padziei ŭ svaim fejsbuku nastupnym čynam: «Kiepskija naviny z Ryhi».
***