Łukašenka: Tyja, chto śćviardžaje, što dziaržava prodažam ałkaholu choča papoŭnić biudžet — apošnija niahodniki i vorahi
president.gov.by
Alaksandr Łukašenka abiacaje novyja miery pa baraćbie z pjanstvam, ale ŭpeŭnieny, što tolki zabaronami prablemu nie vyrašyć. Pra heta jon zajaviŭ siońnia na «Kamvoli», piša BiełTA.
«Ciapier, hladžu, u ŚMI razharnulisia debaty: zabaranić, nie pradavać, pakarać. Nu kali vy chočacie žulikaŭ raźvieści, jakija buduć z-pad krysa, — taksisty i inšyja, — pradavać nočču i pozna ŭviečary ałkahol i kišeni nabivać, heta možna zrabić. Zabarony, jak pakazvaje historyja, vynikaŭ jašče nie davali», — skazaŭ jon.
Jon upeŭnieny, što treba bolš uvahi nadavać zdarovamu i aktyŭnamu ładu žyćcia na ŭsich uzroŭniach — ad siamji da dziaržavy.
«Nie dumajcie, što my zakryli dzieści punkt, pierastali pradavać i damahlisia vyniku. Zamiest hetaha punktu, dva buduć adkryty ŭ inšym miescy. Stvorym deficyt — padšturchniem canu i budziem potym łavić hetych žulikaŭ. Tamu ŭ mianie šmat na stale prapanoŭ. Ja daručyŭ prapracavać ich. Sapraŭdy, z hetaj prablemaj treba niešta rabić».
«U najbližejšy čas pahladzim. Paśla Novaha hoda vierniemsia da hetaj prablemy i budziem jaje vyrašać zychodziačy z mahčymaści. Tut nielha pieracisnuć. Tak, jość prapanova, dapuścim, začynić i z 10 punktaŭ adzin pakinuć. Hłupstva. Ale jość prapanova: tuju, što nasuprać škoły, zakryć. Pravilna, niachaj pieraniasuć jaje ŭ inšaje miesca, ale nasuprać škoły nie pavinny pradavać ałkahol i tytuń. Z hetym zhodny. I šmat takich prapanoŭ. Budziem iści ad žyćcia», — zajaviŭ biełaruski kiraŭnik.
«Maju pazicyju ŭ hetym płanie vy viedajecie. Ja čałaviek amal nie pituščy. Možna skazać, ja mała pju. Ale heta maja pazycyja, majo mierkavańnie. Ludzi ž žyvuć pa zakonach vyznačanych i ŭłasnych ujaŭleńniach pra žyćcio, — adznačyŭ kiraŭnik dziaržavy. — Nu voś my sabralisia tut… U nas što, niepituščyja tut usio. Nu davajcie pierastaniem pić stolki i budziem pa śviatach vypivać abo z nahody adkryćcia novaj vytvorčaści, i ŭsio budzie narmalna. Heta vielmi ciažkaja, składanaja prablema».
Alaksandr Łukašenka źviarnuŭ uvahu, što niekatoryja zajaŭlajuć ab tym, što prablema kureńnia i pjanstva źviazana z tym, što dziaržava choča papoŭnić biudžet. «Heta apošnija niahodniki i vorahi biełaruskaj dziaržavy.
Sapraŭdy, akcyzy na ałkahol i tytuń — heta vialikija padatki (vy čuli, niadaŭna pravodziŭ naradu) — ad tytuniu my atrymajem u hetym hodzie $0,5 młrd u biudžet. Heta piać vašych takich pradpryjemstvaŭ. Kali my tolki ciapier hety akcyz źnizim abo ałkaholu pačniem mienš vyrablać, da nas pryviazuć barmatuchu z Rasii, Ukrainy, z Zachadu. Tolki adčyni — usio siudy chłynie. i akcyzaŭ nie atrymajem, i pić mienš nie staniem. Tamu heta takija razmovy, jak ja kažu pa-narodnamu, «plavuzhańnie». Lubaja dziaržava ŭvodzić akcyzy i atrymlivaje ad hetaha padatki», — padkreśliŭ kiraŭnik dziaržavy.
«Tamu treba znajści ŭzvažany narmalny stan — i tam nie naškodzić, i tut nie stracić. Heta ŭsio nie prosta. Treba ŭsio ŭzvažyć i pryniać rašeńnie. Ale, jašče raz padkreślivaju, usio zaležyć ad nas. Niaprostaja prablema. Budziem jaje akuratna vyrašać, ale naskokam ničoha rabić nie budziem. Sprabavali ŭžo (u minułym) — vinahradniki pavysiakali, i jašče što-niebudź… i ciapier hieraična (ja sustrakajusia z prezidentami kaŭkazskich respublik, Ukrainy) jany adradžajuć toje, što było źniščana ŭ svoj čas. Tamu tut treba iści akuratna, krok za krokam, vyrašajučy hetuju prablemu. My jaje budziem vyrašać. Hetaja prablema ciažkaja», — reziumavaŭ biełaruski kiraŭnik.