ZŠA majuć vydzielić Ukrainie $47 miljonaŭ na nabyćcio «zabojcy tankaŭ»
Rada nacyjanalnaj biaśpieki ZŠA vyrašyła padčas sustrečy ŭ minuły aŭtorak dać zialonaje śviatło pakietu hrantaŭ u pamiery $47 miljonaŭ ukrainskamu ŭradu dla kupli amierykanskich ŭzbrajeńniaŭ. U pastaŭku majuć być uklučanyja mahutnyja supraćtankavyja rakiety Džavielin, paviedamlaje ABC.
Adnak ŭchvalić uhodu jašče pavinny prezident i Kanhres. Džavielin, partatyŭnuju rakietu dla zapusku ź plača, nazyvajuć zabojcam tankaŭ.
Pusk rakiety Javelin
Da hetaha času Tramp i jahonyja daradcy zajmali dosyć aściarožnuju pazicyju ŭ pytańni pastavak śmiarotnaj zbroi Ukrainie, bajučysia paharšeńnia adnosinaŭ z Rasijaj.
Adnak dziaržsakratar Reks Tylersan i ministr abarony hienierał Džejms Mecis z červienia abmiarkoŭvajuć, jakim čynam lepš za ŭsio aformić takuju pastaŭku. Jany nastojliva rekamiendavali Biełamu domu pryniać rašeńnie ab vydzialeńni finansavańnia i prodažy hetych supraćtankavych rakiet Ukrainie.
Čynoŭnik Dziarždepartamienta dadaŭ, što ŭ bližejšyja tydni adbudziecca sustreča, na jakoj buduć abmiarkoŭvacca dalejšyja kroki ŭ hetym kirunku. Ale aficyjny pradstaŭnik Biełaha doma papiaredziŭ, što jany pakul nie hatovyja publična zajavić pra svajo rašeńnie.
Mecis padkreślivaŭ žadańnie vašynhtonskaj administracyi ŭmacavać suviazi z Ukrainaj na žnivieńskaj pres-kanfierencyi ŭ Kijevie z prezidentam Piatrom Parašenkam.
«My tolki što ŭchvalili — zusim niadaŭna, u apošnija paru tydniaŭ — jašče adnu pastaŭku na 175 miljonaŭ dalaraŭ, u tym liku śpiecyjalnaha abstalavańnia, jakoje moža być vykarystana dla abarony krainy. Heta pavialičyć sumu ahulnych pastavak Ukrainie da 750 miljonaŭ dalaraŭ u apošnija niekalki hadoŭ », — skazaŭ amierykanski ministr.
«Ja taksama chacieŭ by adznačyć, što ŭ dačynieńni da abarončaj śmiarotnaj zbroi … my aktyŭna jaje razhladajem», — skazaŭ Mecis. «Ciapier ja viarnusia, ubačyŭšy biahučuju situacyju i zmahu paviedamić dziaržsakrataru i prezidentu ŭ vielmi kankretnych vyrazach, što ja rekamienduju dla dalejšaha raźvićcia», — dadaŭ jon.
Supraćtankavaja rakieta Džavielin — niatannaja zbroja. Košt adnoj puskavoj ustanoŭki — kala $126 tysiač, adna rakieta da jaje kaštuje $78 tysiač. Adnak jaje vysokaja efiektyŭnaść u baraćbie suprać tankaŭ nieadnarazova paćviardžałasia na poli boju. Najaŭnaść jaje na ŭzbrajeńni ŭkrainskaj armii mahła b značna źnizić vierahodnaść masiravanaj tankavaj ataki suprać krainy.
Radyjus efiektyŭnaha dziejańnia rakiet Džavielin (Vikipiedyja)