Śledčy kamitet spyniŭ spravu sałdata, znojdzienaha paviešanym u Piečach 31 sakavika
Śledčy kamitet spyniŭ kryminalnuju spravu, raspačatuju pa fakcie śmierci ŭ vajskovaj čaści №25849 pad Barysavam sałdata terminovaj słužby Arcioma Baściuka. 25-hadovy minčuk byŭ znojdzieny paviešanym 31 sakavika 2017 hoda.
Arciom Baściuk. Fota z Ukantakcie.
«Arciom lubiŭ žyćcio. Ja vam nie mahu pieradać… Jon skončyŭ univiersitet, byŭ vałancioram u Čyrvonym kryžy, byŭ donaram. U jaho nie było škodnych zvyčak, — raspaviadaje Jeŭraradyjo Taćciana Antonaŭna, mama zahinułaha sałdata. — Jon skazaŭ: ja pajdu i adsłužu, kab nie biehać».
Słužba ŭ armii apraŭdała najhoršyja čakańni Arcioma Baściuka. Jon raspaviadaŭ baćkam, što «dziady» prymušali «maładych» kuplać im kavu, cukar, cyharety, nie dazvalali spać. Za nievykanańnie zahadu prymušali adciskacca sotni razoŭ. Chłopiec nie vytrymaŭ i staŭ skardzicca na niestatutnyja ŭzajemaadnosiny.
30 sakavika abmierkavać situacyju ŭ častku pryjazdžali baćki chłopca. Kamandziry paabiacali im razabracca. Ale ŭviečary taho ž dnia sałdat patelefanavaŭ dadomu, kab raźvitacca. Baćki zabili tryvohu i, u svaju čarhu, patelefanavali ŭ častku. Ich zapeŭnili, što ŭsio budzie dobra, ale ranicaj Arcioma znajšli ŭ piatli.
Baćka i maci maładoha čałavieka znajšła advakata i damahłasia taho, kab ich pryznali paciarpiełymi. Śledčy kamitet pačaŭ kryminalnuju spravu, ale nie za daviadzieńnie da samahubstva abo za zabojstva, a pa častcy 3 artykuła 443 Kryminalnaha kodeksa Biełarusi — parušeńnie statutnych praviłaŭ uzajemaadnosin pamiž vajskoŭcami, jakoje paciahnuła ciažkija nastupstvy.
«Sprava jašče idzie, jana da kanca nie abahulnienaja. Praviedziena 7 ekśpiertyz, i ekśpierty ničoha nie mohuć kankretna skazać. Jak u babuli — napałam: moža tak, a moža tak, — raspaviadaŭ na minułym tydni Siarhiej Alaksandravič, baćka Arcioma. — I voś, jany pavinny pryjści da niejkaj vysnovy: zakryć spravu abo praciahnuć, pa jakich artykułach i h.d. Ale, miarkujučy pa ŭsim, pa niestatutnych uzajemaadnosinach ničoha nie vyjaŭlena».
12 kastryčnika baćki Arcioma Baściuka atrymali pastanovu ab spynieńni papiaredniaha rasśledavańnia pa kryminalnaj spravie.
«Za adsutnaściu hramadska niebiaśpiečnaha dziejańnia, praduhledžanaha kryminalnym zakanadaŭstvam, — začytvaje pastanovu matula zahinułaha sałdata. — Heta poŭnaje biaźmiežža. Kali jon pryjšoŭ u častku, jon raspaviadaŭ, jakija tam žachi. Paśla taho, jak u špitali palažaŭ i vyjšaŭ — kazaŭ: usio, heta niemahčyma».
Advakat Siarhieja i Taćciany Baściukoŭ padrychtavaŭ i adpraviŭ chadajnictva: «Z ulikam abstanoŭki na miescy zdareńnia, vyjaŭlenych cialesnych paškodžańniaŭ, asablivaściaŭ stranhulacyjnaj barazny [śled ad viaroŭki na šyi zahinułaha] ci vyśvietlenyja niejkija abjektyŭnyja dadzienyja, što dakazvajuć ci vyklučajuć, što Baściuk Arciom ździejśniŭ paviešańnie samastojna, biez starońniaj dapamohi?». Adnak, pa słovach Taćciany Antonaŭny, jano było pakinutaje biez adkazu.
Siamja Baściukoŭ maje namier abskardzić pastanovu i damahacca adnaŭleńnia kryminalnaj spravy pa fakcie śmierci syna.