Uračystaści pieršaj kamunii ŭ katalikoŭ
21 maja 2006 h. u mnohich parafijach adbyłasia ŭračystaść Pieršaj Kamunii.
21 maja 2006 h. u mnohich parafijach adbyłasia ŭračystaść Pieršaj Kamunii. Da hetaha sakramentu dzieci, pavodle pastanovaŭ Sinodu Minska-Mahiloŭskaj archidyjacezii, Pinskaj i Viciebskaj dyjacezij, rychtavalisia na zaniatkach pa relihii na praciahu dvuch hadoŭ.
U hod, pryśviečany pamiaci Słuhi Božaha Jana Paŭła II, uračystaść Pieršaj śviatoj Kamunii stała dobraju nahodaju dla taho, kab jašče raz viarnucca da vučeńnia Vialikaha Papy na temu Eŭcharystyi:
«Uklučeńnie ŭ Chrysta, jakoje adbyvajecca u sv. Chroście, adnaŭlajecca i pastajanna ŭmacoŭvajecca praz udzieł u eŭcharystyčnaj Achviary, pieradusim tady, kali hety ŭdzieł poŭny dziakujučy ŭdziełu ŭ sakramentalnaj Kamunii. My možam skazać, što nie tolki kožny z nas prymaje Chrysta, ale taksama Chrystus prymaje kožnaha z nas. Jon umacoŭvaje poviazi siabroŭstva z nami: «Vy – druhi Maje» (Jan 15, 14). My sapraŭdy žyviem dziakujučy Jamu: «Toj, chto spažyvaje Mianie, žyć budzie Mnoju» (Jan 6, 57). U eŭcharystyčnaj Kamunii ŭźniosłym čynam realizujecca ŭnutranaje «pražyvańnie» Chrysta i vučnia: «Budźcie ž u va Mnie, i Ja ŭ vas [budu]» (par. Jan 15, 4).
Jadnajučysia z Chrystom, Lud Novaha Zapavietu dalokija ad taho, kab zamykacca ŭ sabie, stanovicca «sakramentam» dla ŭsiaho rodu ludskoha, znakam i pryładaju zbaŭleńnia, ździejśnienaha Chrystom, śviatłom śvietu i solaju ziamli (par. Mc 5, 13–16) dla adkupleńnia ŭsich» (Ecclesia de Eucharistia, 22).
U minskaj archikatedry Imia Najśviaciejšaj Panny Maryi Pieršuju Kamuniju, jakuju pryniali 59 dziaciej, udzialiŭ dapamožny biskup Minska-Mahiloŭskaj archidyjacezii Antonij Dziamjanka.
U hety ž dzień z ruk biskupa Antonija Pieršuju Kamuniju pryniali 147 junych parafijanaŭ kaścioła śviatych Symona i Aleny.
Niahledziačy na dadžlivaje nadvorje, pracesijaj raspačałasia ŭračystaść Pieršaj Kamunii ŭ parafii śviatoha Jana Chryściciela, dzie 26 dzieciam udzialiŭ pieršuju Kamuniju probašč parafii a. Ihar Łašuk.
U hrodzienskaj parafii Maci Božaj Aniolskaj Pieršuju Kamuniju sioleta pryniali 105 dzietak.
Va ŭsich parafijach, dzie adbyłasia Pieršaja Kamunija, raspačaŭsia «bieły tydzień», padčas jakoha dzieci va ŭračystych biełych strojach štodzionna ŭdzielničajuć u śviatoj Imšy i molacca pierad Najśviaciejšym Sakramentam.
Tekst i fota catholic.by