Ministr kultury Bondar: «Budziem zaachvočvać da movy, uładkujem majontki, prymajem niejmaviernyja prapanovy ad ludziej»
Novy ministr kultury Juryj Bondar adkazaŭ na pytańni karespandenta dziaržaŭnaha ahienctva BiełTA. Pryvodzim cikavyja vytrymki ź jaho adkazaŭ.
«Maja asabistaja prahrama-maksimum — heta zachavańnie historyka-kulturnaj spadčyny. Naležyć uładkavać abjekty nie tolki ŭ Minsku, ale i ŭ rehijonach: cerkvy, siadziby i šmat čaho inšaha»,— skazaŭ Bondar pra svaje płany jak kiraŭnika.
Ministr taksama skazaŭ, što bačyć patrebu ŭ novych turystyčnych maršrutach pa krainie.
Źviartaje ŭvahu taksama farmuloŭka žurnalistki BiełTA, jakaja pacikaviłasia, «ci zdymiem my svoj nacyjanalny film?» (nahadajem, što ŭ časy kiravańnia Barysa Śviatłova takim filmam čynoŭniki nazyvali pravalny «Kod Kaina», na jaki ź biudžetu było vydatkavana kala $2 miljonaŭ, a adbili dzieści 1%).
«Ja ŭ hetym nie sumniajusia, — skazaŭ Bondar. — Nie abaviazkova taksama i vydatkoŭvać vialikija srodki: šmat filmaŭ rabilisia šedeŭrami pry minimalnym biudžecie. Nakont scenara: Minkult adkryty dla ŭsich scenarystaŭ, samych niejmaviernych prapanovaŭ — u tym liku tych, jakim niekali admovili. Nadyšoŭ čas stvaryć vakoł kinastudyi tvorčy asiarodak, jaki b jadnaŭ biełaruskich scenarystaŭ, režysioraŭ — u tym liku, pracujučych za miažoj, — i matyvavać ich na stvareńnie nacyjanalnaha kinapradukta».
Vykazaŭsia ministr i pra biełaruskuju movu.
«Mova — duša kultury, tamu našaja zadača, biezumoŭna, u stvareńni ŭmovaŭ dla raźvićcia biełaruskaj movy, jaje papularyzacyi ŭ hramadstvie. My ciapier bačym sučasnyja trendy: stała modnym nasić vyšyvanku, paŭsiadzionna havaryć pa-biełarusku. Heta vydatna. Ministerstva kultury budzie ŭsimi siłami zaachvočvać padobnyja inicyjatyvy».