Karcina, jakaja tłumačyć usio pra represii
Voś karcina. Jaje techničnyja dadzienyja — 2017, 150Ch275 sm, pałatno, alej. Nikoli nie ŭmieła čytać hetyja abaviazkovyja dla karcin paznaki, to bok razumieła, što jany značać — hod, pamier, materyjały, — ale doŭhi čas nijak nie ciamiła, čamu mienavita jany i navošta naohuł.
Z nazvami ŭžo praściej. Nazvy karcin ja čytać umieju i lublu: mastak, jaki zaŭsiody abmiežavany pamierami pałatna i z hetaj pryčyny navučany kancentravać dumku i srodki jaje vyražeńnia, nazyvaje svaje karciny hetak sama, jak paet nazyvaje vierš. Hetaja nazyvajecca — «Kłub Dziaržynskaha, albo Noč paetaŭ».
Ja nienavidžu Kłub Dziaržynskaha. La jahonaha ŭvachoda mnie fizična robicca błaha — ad nianaviści. Chacia nichto i nikoli nie pakryŭdziŭ mianie ani ŭ tym kłubie, ani ŭ dźviarach pobač, dzie prymalisia pieradačy ŭ «amierykanku», ludzi adtul, pa maim asabistym dośviedzie, zaŭsiody vietlivyja, cichahałosyja i skupyja ŭ žestach. Da taho ž ja viedaju, što siarod ich jość hodnyja, ščyryja, dobrazyčlivyja — jak paŭsiud. Ale voś jakraz za Noč paetaŭ — nienavižu.
Pahladzicie na hetuju karcinu. Jany schapilisia za partupiei hetym chrestamatyjnym žestam. «Im ža patrebna niejkaje apiryšča, a dzie jano?» — tak patłumačyŭ mnie hety žest aŭtar. Jany schapilisia za hetyja partupiei, i ruki im źviadzie, jak zvodziła palcy katam, i jany — jak my, u ich taksama jość karparatyŭnaja etyka, karparatyŭnyja śviaty, karparatyŭnyja kłuby, karparatyŭnaja ŭpeŭnienaść — voś hetaje ŭsio. Tut kožnaja detal: i hetyja chalonyja, ale niejkija biezabaronnyja, miakkija patylicy, i kielichi ź vinom, i napružany adčaj pravaj ruki, i śvietacieni — usio bje ŭ metu. Jany taksama ludzi, voś što samaje strašnaje.
Ja nie viedaju pakul što inšaha tvora mastactva, pryśviečanaha represijam, u jakim by ŭsia hłybinia hetaj źjavy, usie sensy, i chrestamatyjnyja, i niechrestamatyjnyja, razhortvalisia by tak imkliva z adnoj, idealna skanstrujavanaj i mocna składzienaj mietafary.
Karcinu možna pabačyć na vystavie «Stolnaje miesca» ŭ Pałacy mastactvaŭ. Jana tam — adna z samych vialikich, bo 150Ch275 — heta maštabna. Jaje treba pabačyć, bo 2017 hod — hod sumnaha jubileju Nočy paetaŭ. Jaje niemahčyma nie pabačyć — bo pałatno i alej akazalisia bolš vyraznymi, čym papiera i ałovak.
Aŭtar — Andrej Dubinin.