22-hadovaja aktyvistka, jakuju vyklikajuć u milicyju paśla akcyi 8 vieraśnia: «BČB-pałatno ŭ rukach i aktyvizm — heta sprava sumleńnia»
Pa padlikach zakrytaha ŭładami pravaabarončaha centra «Viasna», na dadzieny momant za 8 vieraśnia asudzili abo jašče buduć sudzić dzieviać čałaviek.
Udzielniki akcyi 8 vieraśnia, prymierkavanaj da Dnia biełaruskaj vajskovaj słavy, pačali atrymlivać vykliki ŭ milicyju dla składańnia pratakołaŭ pavodle artykuła 23.34 KoAP (udzieł u niesankcyjanavanym masavym mierapryjemstvie). Siarod ich sustaršynia BCHD Pavieł Sieviaryniec, aktyvisty Leanid Kułakoŭ, Siarhiej Kuncevič, sustaršynia ruchu salidarnaści «Razam» Alena Tałstaja, Aleś Makajeŭ. Pratakoły składuć na pradstaŭnika kampanii «Alternatyva» Dźmitryja Silčanku i na Viačasłava Siŭčyka.
Hreta Sabaleŭskaja ŭ centry z BČB-pałatnom.
Siarod pastajannych udzielnikaŭ akcyj, jakich vyklikajuć u milicyju, jość i imiony maładzionaŭ. Tak, 22-hadovuju Hretu Sabaleŭskuju spynili adrazu paśla piatničnaha mierapryjemstva: jana dapamahała nieści inšym ludziam bieł-čyrvona-biełaje pałatno. Dziaŭčynu zvazili ŭ pastarunak, pierapisali pašpartnyja dadzienyja i adpuścili, a 15 vieraśnia vyklikajuć u Centralny RAUS Minska.
My źviazalisia z Hretaj (jakuju na samoj spravie zvać Marharytaj), kab raspytać jaje pra pieršy dla jaje dośvied nastupstvaŭ vykazvańnia pratestu.
Fota Hrety-Marharyty z sacyjalnych sietak.
«Zvyčajna ja nie prapuskaju nivodnaj akcyi, bačyła i Dzień Voli, i Čarnobylski šlach, i letnija pratesty. U hety raz pajšła na mierapryjemstva adna, ale na miescy sustreła šmat znajomych. Milicyjanty spynili mianie potym užo ŭ mietrapalitenie, prosta padyšli, ničoha nie rastłumačyli i paprasili prajści ź imi ŭ adździaleńnie. Adpuścili chutka, ale voś, jak śviedčyć papierka, znoŭ čakajuć mianie 15 vieraśnia».
Z baćkami ŭ Hrety palityčnyja pohlady mocna roźniacca, ale jany nie žyvuć razam, tamu ŭ takija momanty dziaŭčyna sama za siabie adkazvaje. Siabry rajać joj nie iści druhi raz u milicyju, ale jana nie ličyć siabie złačyncam, tamu budzie vieści z pravaachoŭnikami adkryty dyjałoh.
Cikava, što tata dziaŭčyny rodam z Rasii, a maci — polka. Jana ž uśviedamlaje siabie biełaruskaj. Movu Marharyta samastojna pačała vyvučać nie tak daŭno. Na žyćcio ž zarablaje pierakładami z kitajskaj.
Nahadajem, što za ŭdzieł u akcyi ŭžo byli vypisanyja pieršyja štrafy: 460 rubloŭ pavinien zapłacić dziaržavie aktyvist Stanisłaŭ Paŭlinkovič.
Čytajcie pa temie: 300 čałaviek pratestavali ŭ Minsku suprać vučeńniaŭ «Zachad-2017» VIDEAANŁAJN