Śviatłana Aleksijevič dapamahła žančynie-invalidu z Homiela pahasić bankaŭski kredyt
Historyja 42-hadovaj homielskaj invalidki Natalli Vasilenki, jakuju za kamunalnyja zapazyčanaści KŽREUP «Savieckaje» navažvałasia sioleta vysielić z arendavanaha pakoju, mocna ŭraziła piśmieńnicu Śviatłanu Aleksijevič. Nobeleŭskaja laŭreatka stała štomiesiačna dasyłać Natalli hrašovyja pieravody pa 200 rubloŭ, a ŭ žniŭni sustrełasia ź joj dy pieradała tysiaču dalaraŭ na pahašeńnie daŭhoŭ.
Žyćcio na dva rubli za dzień
Ź nievialikaj pensii invalida 3 hrupy Natalli Vasilenki ŭpraŭleńnie sacyjalnaj abarony administracyi Savieckaha rajonu Homli vyličvaje pavodle roznych vykanaŭčych listoŭ amal pałovu dziaržaŭnaj dapamohi. U vyniku žančyna vymušana vyžyvać na 74 rubli ŭ miesiac — pa sutnaści, na dva rubli z kapiejkami za dzień.
Ahulny ž doŭh žančyny-invalida składaje 6748 rubloŭ, asnoŭnaja častka jakoha (6046 rubloŭ) — heta try bankaŭskija kredyty.
«Z dapamohi, jakuju mnie akazała Śviatłana Aleksijevič, — kaža Vasilenka, — ja zapłaciła 1243 rubli «Ideja Banku». Dumaju skarystać reštu dapamohi, kab całkam raźličycca z hetym bankam. Dziakuj vialiki Śviatłanie Alaksandraŭnie. Jana mianie i biez taho bałuje: u žniŭni dasłała navat dva pieravody pa 200 rubloŭ — na dadatak da dalaravaj dapamohi. Mnie choć leki jość za što kupić».
Žančyna zhadvaje, što pieršy spažyviecki kredyt na 5 miljonaŭ niedeminavanych rubloŭ jana ŭziała ŭ «Delta Banku» ŭvosień 2012 hodu. Paśla prystupu epilepsii jana zastałasia biaz pracy. Da taho ž mocna chvareła maci — joj taksama byli patrebny leki. Spłačvać pazyku nie było čym, niaŭstojka rasła. Na kredyt u «Ideja Banku» kuplała kamputar i televizar, kab niejak zaniać siabie. Maci da taho času pamierła, i Natalla zastałasia adna ŭ arandavanym pakoi. Jana dy čorny kot Majkł. Inšyja dva pakoi ŭ trochpakajoŭcy vysotnaha panelnaha šmatpaviarchovika dastalisia stryječnaj siastry z mužam, jakija svaju žyllovuju płošču daŭno pryvatyzavali.
Pakoj ad dzieda
Trochpakajovuju kvateru u domie pa vulicy Žukava atrymaŭ koliś jejny dzied. Tut žančyna j hadavałasia. Baćka źjechaŭ u Rasieju, pakinuŭšy dačku na vychavańnie maci dy dzieda z babaj.
Natalla skončyła dzieviać klasaŭ u siaredniaj škole № 32. Dalej vučycca nia stała. Ad centra zaniataści nabyła specyjalnaść malara-tynkoŭščycy, uładkavałasia ŭ SU-107 AAT «Homielprambud». A jašče naviedvała sekcyi lohkaj atletyki i boksu.
Pakul pracavała, niakiepska zarablała. A kali zdaryŭsia vypadak z epilepsijaj, žyćcio pakaciłasia ŭ tartarary. Lekary ŭviali šerah abmiežavańniaŭ na pracu: zvyš vaśmi hadzinaŭ rabić nielha, u načnuju źmienu nielha, z roznymi mechanizmami nielha, z škodnymi rečyvami nielha, ź ludźmi taksama nielha. Navat na pierabirańnie harodniny nie prajšła medyčnuju kamisiju. Ruki apuścilisia. Bo da hetaha žančyna jeździła za miežy horadu na roznyja budaŭničyja abjekty, «śviaciła» navat doŭhaterminovaja kamandziroŭka ŭ Venesuełu.
Biada adna nia chodzić
Treciuju hrupu invalidnaści Natalli pryznačyli tolki praz dva z pałovaj hady paśla zvalnieńnia z budaŭničaj arhanizacyi — u 2014-m. Paśla vyjavilisia prablemy z sercam, kryvianym ciskam. U 2016 hodzie Vasilenka naahuł pieraniesła insult. Jak vyžyła, sama ździŭlajecca. «Raniej, da insultu, u mianie byli niejkija spadzievy na lepšaje. Dumała, viarnusia choć pasudamyjkaj u kaviarniu ci jašče kudy ŭładkujusia i niejak pražyvu. Byli dumki naahuł źjechać u emihracyju — u Švecyju albo ŭ Izrail. Ciapier ź insultam dy epilepsijaj ja ŭžo nikomu nie patrebnaja. Vo chiba tolki začapicca za łancužok», — Natalla skrušna pakazvaje na stol, ź jakoj źvisaje łancužok, što niekali trymaŭ pryhožuju žyrandolu dla aśviatleńnia nievialičkaha pakoju, dzie aproč ladoŭni, łožka dy stolika ź nievialičkimi paličkami, zabitymi lekami, nijakich lišnich rečaŭ niama.