Drukavali hrošy na pryntary, nabyvali žujki: u Minsku zatrymali falšyvamanietčykaŭ
Dvaich minčukoŭ zatrymali za padrobku hrošaj — jany drukavali novyja 20-rublovyja kupiury.
Charakterna, što heta pieršy vypadak u Biełarusi padrobki novych banknot.
Śledstvam vyznačana, što ŭzimku hetaha hoda 28-hadovy mužčyna ŭ siabie na leciščy naładziŭ vyrab padroblenych hrošaj naminałam 20 rubloŭ. U dalejšym jon pieradavaŭ takija banknoty svajmu 26-hadovamu znajomamu minčuku, jaki nabyvaŭ na ich roznyja drobnyja tavary: žujku, kvitki na transpart, apłačvaŭ prajezd u maršrutnych taksi.
Atrymanuju reštu jany dzialili pamiž saboj.
«Pry pieratrusie pa miescy žycharstva padazravanych kanfiskavali kampjutarnuju techniku, banknoty naminałam 20 rubloŭ, pryłady dla druku, narychtoŭki dla piačatak z adbitkami štampaŭ roznych arhanizacyj, błanki daviedak ab dachodach fizičnaj asoby.
Ekśpiertyza pakazała, što hrošy nadrukavanyja na kalarovym strujnym pryntary. Imitacyju achoŭnaj stužki taksama drukavali, a paśla nanosili frahmienty falhi na adzin z bakoŭ banknoty.
Mužčynam pradjavili abvinavačvańnie ŭ vyrabie i zbycie padroblenych hrošaj, zamachu na tyja ž dziejańni, učynienyja paŭtorna, a taksama ŭ padrobcy i vyrabie padroblenych dakumientaŭ i štampaŭ. Usiaho im inkryminujecca 26 epizodaŭ złačynnaj dziejnaści.
Mužčynam pahražaje da 15 hadoŭ.
Sprava pieradadziena prakuroru dla nakiravańnia ŭ sud.