U Pružanskim DK anansavanaja dyskateka pad rasijskim ściaham. Dyrektarka paśla zvanka žurnalistaŭ: «Prybiarem»
Čytačy «Našaj Nivy» źviarnuli ŭvahu na zapłanavanuju na 5 žniŭnia dyskateku ŭ Pružanach. Afiša «Russkoj viečierinki» azdoblena rasijskim trykałoram i matroškami.
Darečy, raniej u tym pałacy była dyskateka, na jakuju zaklikała afiša z kamunistyčnaj simvolikaj — sierpam i mołatam — a taksama vyjavami tyranaŭ XX stahodździa: Stalinym, Mao Dzedunam dy inšymi. Tady, paśla skarhaŭ hramadskaści, jaje źniali.
«Što heta za naviazvańnie rasiejščyny ŭ rehijonach, čamu našych dyskatek nie robiać? Heta ž dziaržaŭny Pałac kultury!», — napisali nam čytačy.
Žurnalist «Našaj Nivy» adrasavaŭ hetaje pytańnie vykanaŭcy abaviazkaŭ dyrektara Alonie Łosievaj.
«Ščyra kažučy, nie bačyła pakul. — adkazała Łosieva. — Biez majho dazvołu pastavili. Što vy kažacie? Ściah rasijski? Zzrazumieła, zaraz prymu zachady. Ja ž papiaredžvała paśla taho vypadku ź siarpom i mołatam, što tolki paśla majoj zhody… A jany znoŭ… Dziakuj, budziem raźbiracca».