U Litvie rasijanina asudzili na 10 hadoŭ za špijanaž
Vilenski akruhovy sud pryhavaryŭ rasijanina Mikałaja Filipčanku da 10 hadoŭ pazbaŭleńnia voli pa abvinavačvańni ŭ špijanažy. Ułady Litvy śćviardžajuć, što Filipčanka byŭ dziejučym supracoŭnikam rasijskich śpiecsłužbaŭ.
Pavodle infarmacyi departamienta dziaržbiaśpieki Litvy, heta pieršy vypadak, kali ŭ krainie pa abvinavačvańni ŭ špijanažy byŭ zatrymany supracoŭnik FSB.
Zhodna z materyjałami suda, Filipčanka sprabavaŭ zavierbavać słužačych departamienta dziaržbiaśpieki krainy, kab tyja ŭstanavili pryłady dziela prasłuchoŭvańnia ŭ rezidencyi i pracoŭnym kabiniecie prezidenta respubliki Dali Hrybaŭskajcie.
Pa śćviardžeńni pravaachoŭnych orhanaŭ Litvy, Filipčanka vykarystaŭ padroblenyja dakumienty i nieadnarazova nielehalna pierasiakaŭ miažu krainy.
Jak zajaviła sudździa Rehina Pocienie, rasijanin admoviŭsia davać pakazańni pa spravie. Jon taksama nie staŭ adkazvać na pytańni žurnalistaŭ, kali jaho pad achovaj vyvodzili z zały suda.
Pa słovach advakata Filipčanka Haliny Kardanoŭskaj, jaje padabaronny vinu nie pryznaje.
Prysud moža być abskardžany ŭ Litoŭskim apielacyjnym sudzie na praciahu 20 dzion.
Filipčanka byŭ zatrymany na terytoryi Litvy ŭ 2015 hodzie, kali išoŭ tranzitnym ciahnikom z Kalininhradskaj vobłaści ŭ Biełaruś.