Łukašenka vyznačyŭ kancepcyju raźvićcia Biełarusi
Alaksandr Łukašenka siońnia ŭ čas rabočaj pajezdki ŭ Viciebskuju vobłaść paznačyŭ kancepcyju raźvićcia Biełarusi z akcentam na stvareńnie ŭ nasielenych punktach roznaha ŭzroŭniu jakasnych umovaŭ dla žyćcia ludziej.
Naviedvajučy haradski pasiołak Kopyś, kiraŭnik dziaržavy zasłuchaŭ dakłady ab sacyjalna-ekanamičnym raźvićci hetaha nasielenaha punkta — adpaviednyja daručeńni byli dadzienyja im u listapadzie 2016 hoda.
Za hety čas u pasiołku zrabili inžynierna-transpartnuju infrastrukturu, uklučajučy rekanstrukcyju vulična-darožnaj sietki; stvaryli novyja sacyjalnyja, handlovyja, turystyčnyja i spartyŭnyja abjekty; praviali madernizacyju dziejučych pradpryjemstvaŭ. Pry hetym, jak było paviedamlena kiraŭniku krainy, uličvalisia pažadańni miascovych žycharoŭ. Usie pracy atrymałasia pravieści ŭ maksimalna karotkija terminy, jakasna i niadoraha.
«Jašče raz chaču dla ŭsich padkreślić, što heta nie prosta dla pakazuchi my robim. Nasamreč my chočam pakazać, jakim čynam my pavinny ŭładkavać takija pasiołki haradskoha typu, — zajaviŭ Alaksandr Łukašenka. — U nas ich, moža, 60—70 takich pasiołkaŭ. Naturalna, ich treba pryvieści ŭ dobry stan».
Pry hetym kiraŭnik dziaržavy źviarnuŭ uvahu, što treba detalova pradumać uładkavańnie hetych nasielenych punktaŭ, paraicca ź miascovymi žycharami, ale razam z tym abyścisia biez praźmiernaściaŭ. «My zrabili adzin pasiołak. Usich hubiernataraŭ siudy pryviaziom. Z nastupnaha hoda ŭ kožnaj vobłaści dva pasiołki kožny hod dastań i pakładzi. Mienavita tak, jak tut u Kopysi, my ich pavinny pryvieści ŭ paradak. Tady my zamykajem viertykal adnaŭleńnia krainy, pra jakuju ja kazaŭ: Minsk, abłasnyja centry, rajonnyja centry (jany ŭsio ŭ paradku, navat u Viciebskaj vobłaści), nižej idzie ahraharadok (taksama viedajem, jak rabić), dalej iduć pasiołki haradskoha typu i vioski, dzie raniej byli centry abjadnanych haspadarak», — adznačyŭ jon.