Da kanca lipienia parkoŭka ŭ dvarach kala minskaha vakzała stanie płatnaj
U kancy lipienia ŭ dvarach žyłych damoŭ kala čyhunačnaha vakzała aprabujuć sistemu, jakaja aŭtamatyčna raspaznaje numary aŭtamabilaŭ i vystaŭlaje rachunak za parkoŭku ich uładalnikam. Pra heta ahienctvu «Minsk-Naviny» raspavioŭ namieśnik kiraŭnika administracyi Kastryčnickaha rajona Alaksandr Juchimuk.
Ź jaho słoŭ, u kvartale, raźmieščanym u miežach vulic Leninhradskaj i Kirava, užo ŭstalavali niekalki kamier. Jany buduć raspaznavać numary aŭtamabilaŭ, jakija zajazžajuć u dvor. Kali mašyna naležyć žycharu doma, parkoŭka budzie biaspłatnaja. Pa žadańni pražyvajučych tut haradžan možna budzie ŭnieści ŭ śpiecyjalnuju bazu na abmiežavany čas numary aŭtamabilaŭ ich haściej. Płanujecca, što zrabić heta jany zmohuć praź śpiecyjalny mabilny dadatak abo sajt.
Naturalna, biaspłatna tut zmohuć spyniacca aŭtamabili chutkaj dapamohi, milicyi, MNS i inšy śpiectranspart. A voś tym, chto nie pražyvaje ŭ bližejšych damach, pryjdziecca rasstacca ź niemaleńkaj sumaj. Pakul jana dakładna nie vyznačanaja, ale płanujecca, što hadzina parkoŭki ŭ dvary «Bramy Minska» abydziecca ŭ sumu ad 2 da 5 rubloŭ. Pra sposaby raźliku aŭtamabilisty zmohuć daviedacca prosta na parkoŭkach — tam ustalujuć infarmacyjnyja znaki, na jakich buduć paznačanyja taryfy i sposaby apłaty. Naprykład, uładalniki zmohuć raźličycca praź śpiecyjalny mabilny dadatak, jaki ŭžo raspracavany. Kali ž uładalnik aŭtamabila admovicca heta rabić, to na jaho adras dašluć paviedamleńnie z patrabavańniem apłacić parkoŭku.
U susiednim dvary, u miežach vulic Uljanaŭskaj, Śviardłova i Kirava, stajanka taksama stanie płatnaj. Adnak tam kantralavać praces buduć rabotniki parkovak. Padobnaja praktyka ŭžo prymianiajecca na bulvary Mulavina. Vyjaviŭšy čužuju mašynu, jany kładuć pad dvorniki čyrvonyja ŭlotki, jakija infarmujuć ab tym, što čałaviek zajechaŭ pad znak. Kali vyjaŭlajecca fakt parkoŭki starońniaha transpartu na dvarovaj terytoryi, rabotnik abaviazany jaho zafiksavać: zrabić fota z 3-4 punktaŭ z GPS-kaardynatami, kab była pryviazka da miascovaści. Hetyja danyja źbirajucca, analizujucca na praciahu miesiaca, udakładniajecca, ci sapraŭdy hetaja mašyna nie naležyć nikomu z žycharoŭ. Kali vyśviatlajecca, što transpart starońni, to źviestki adpraŭlajucca ŭ DAI.
Jak paviedamili ŭ DU «Parkoŭki stalicy», tuju sistemu, jakaja siabie lepš zarekamienduje, u budučyni vykarystajuć u prablemnych dvarach i na prajeznych častkach pa ŭsim horadzie. Naprykład, adnu ź ich taksama płanujuć vykarystoŭvać i na vulicy Varanianskaha.
Asnoŭnaja meta takich płatnych stajanak — razhruzić ad aŭtamabilaŭ prablemnyja dvary i vulicy Minska, palepšyć ekałahičnuju abstanoŭku ŭ horadzie.