Mej prapanuje hramadzianam ES paśla «breksitu» status pasialenca
Brytanski ŭrad apublikavaŭ 15-staronkavy dakumient, u jakim vykładajecca padrabiaznaja infarmacyja ab tym, što Brytanija prapanuje hramadzianam Jeŭrasajuza paśla «breksitu», piša VVS.
U im havorycca, što ŭsie hramadzianie ES, jakija pražyvajuć u Brytanii na zakonnych padstavach na praciahu jak minimum piaci hadoŭ, atrymajuć «status pasialenca» i zmohuć pryvieźci ŭ krainu muža/žonku i dziaciej.
Datu, ź jakoj budzie vieścisia adlik terminu pražyvańnia ŭ Brytanii, jašče treba budzie ŭzhadnić. Hramadzianie ES, čyj staž pražyvańnia ŭ Brytanii akažacca niedastatkovym dla atrymańnia «statusu pasialenca», atrymajuć dva hady na toje, kab «urehulavać svoj status».
Hramadzianie ES, jakija žyvuć u Brytanii, pavinny mieć prava na znachodžańnie ŭ krainie i paśla «breksitu», zajaviła ŭ paniadziełak premjer-ministr Tereza Mej, vystupajučy ŭ Pałacie abščyn parłamienta.
Kiraŭnik urada ŭpieršyniu vykazała svaje płany pa pradastaŭleńni harantyj hramadzianam ES, jakija, jak jana ličyć, pavinny «źniać zaniepakojenaść» u 3,2 młn hramadzian ES, jakija pražyvajuć u Brytanii.
Adnak lubyja abaviazacielstvy pa budučym pravavym statusie hramadzian pavinny być uzajemnymi i harantavać pravy 1,2 młn brytanskich emihrantaŭ, jakija pražyvajuć na kantyniencie, ahavaryłasia Mej.
Lidar lejbarystaŭ Džeremi Korbin raskrytykavaŭ płany ŭrada: pa jaho słovach, jany nievielikadušnyja, hramadzianam ES prapanujecca «zanadta mała i zanadta pozna».
Na dumku Korbina, Brytanija pavinna była ŭ adnabakovym paradku harantavać biaśpieku hramadzianam ES adrazu paśla letašniaha hałasavańnia pa «breksicie».
Klučavyja punkty prapanoŭ brytanskaha ŭrada:
- Tyja, kamu pradastaŭleny «status pasialenca», zmohuć žyć, pracavać, vučycca i atrymlivać dapamohu hetak ža, jak i ciapier;
- Datu adliku terminu asiełaści miarkujecca ŭstalavać pamiž 29 sakavika 2017 hoda i 29 sakavika 2019 hoda;
- Hramadzianie ES, jakija pražyvali ŭ Brytanii mienš za piać hadoŭ pa stanie na datu adliku, buduć mieć prava žyć i pracavać u krainie da zakančeńnia tak zvanaha lhotnaha pieryjadu — jak čakajecca, na praciahu dvuch hadoŭ;
- Pa zakančeńni hetaha terminu jany zmohuć padać zajavu na časovaje pražyvańnie ŭ Brytanii;
- Paśla piaci hadoŭ pastajannaha pražyvańnia ŭ Brytanii jany mohuć pretendavać na «status pasialenca»;
- Členy siamji tych hramadzian Jeŭrasajuza, što zakonna pražyvajuć u Brytanii, jakija znachodziacca za miažoj, mohuć ujechać u krainu i padać zajavu na «status pasialenca»;
- Brytanskija ŭłady pakidajuć za saboj prava admaŭlać u pradastaŭleńni «statusu pasialenca» asobam, jakija ŭčynili ciažkija złačynstvy, a taksama ŭjaŭlajuć pahrozu biaśpiecy krainy.