Na matčy «Nioman» — BATE ŭ zaŭziataraŭ zabrali płakat z malitvaj za hrodzienski kłub FOTAFAKT
Niepryjemnaja situacyja adbyłasia na hrodzienskim stadyjonie ŭ niadzielu, kali «Nioman» hulaŭ suprać BATE (0:1). Hrodzienskaja siamja Piatrevičaŭ vyrašyła padtrymać rodnuju kamandu malitvaj i na matč z čempijonami pryjšła z płakatam, na jakim była vytrymka ź Biblii. Napisanaje nie spadabałasia śpiecyjalistu pa biaśpiecy hrodzienskaha kłuba i płakat byŭ kanfiskavany ŭ pierapynku. Pryčyna — niezarehistravany banier.
Dziejańni supracoŭnika kłuba Siarhieja Hojžy nie spadabalisia siamji, jakaja niekalki hadzin malavała płakat.
«Supracoŭnik kłuba pryjšoŭ u supravadžeńni milicyi i prosta zabraŭ u nas Słova Božaje. Skazaŭ, što nielha takoje trymać na stadyjonie, — raspaviadaje Anastasija Piatrevič. — Ale što tut drennaha? My ź dziećmi staralisia, malavali ceły viečar płakat, kab padtrymać kamandu. Tak, my vierniki i molimsia za «Nioman», tym bolš u našych chłopcaŭ mieŭsia być surjozny matč z mocnym supiernikam. My chacieli, kab Boh dapamoh lubimaj kamandzie abyhrać čempijona krainy i mienavita tamu pryjšli z malitvaj na matč. Paśla takoha staŭleńnia ničoha nie chočacca rabić — nijakaj tvorčaści. My ž pryjšli na stadyjon z płakatam nie suprać dziaržavy ci jakoha-niebudź čałavieka, my prosta napisali, kab Boh dapamoh «Niomanu».
Śpiecyjalist pa pracy z zaŭziatarami hrodzienskaha kłuba Volha Trafimovič padčas matču padyšła da trybunaŭ, pahladzieła płakat siamji Piatrevičaŭ i ničoha zabaronienaha tam nie ŭbačyła. Niahledziačy na heta, płakat u pierapynku matču byŭ kanfiskavany.
«Pa źmieście płakata ničoha zabaronienaha na im nie namalavana i nie napisana, — raspaviadaje Volha. — Niama ničoha drennaha ŭ vytrymcy ź Biblii, kali ludzi takim čynam padtrymlivajuć «Nioman». Tak, pa praviłach rehłamientu banier pavinien być zarehistravany ŭ rejestry albo pierad matčam zaćvierdžany ŭ inśpiektara, ale pra takoje infarmavanyja bolš aktyŭnyja fanaty, čym hledačy abo zaŭziatary. Tamu ŭ pačatku matča ja padyšła da našych zaŭziataraŭ, pahladzieła płakat i pierakanałasia, što na im usio ŭ paradku. Mahčyma, dla ŭpeŭnienaści treba było paviedamić inśpiektaru matču, ale pra taki vynik nie było i dumki ŭ toj momant».
Paśla matču inśpiektar ničoha drennaha ŭ baniery nie ŭbačyŭ, jak i milicyja. Ale płakat siamji Piatrevičaŭ tak i nie addali.