Łord Beł stavić ptušačku nasuprać punktu «Kazulin»
Zaŭvažcie, na jakim palityčnym fonie — vonkavym i ŭnutranym — Łukašenka padpisaŭ ukaz pra pamiłavańnie palitviaźnia № 1. Piša ŭ svaim błohu Alaksandar Kłaskoŭski.
Pakazalna, na jakim palityčnym fonie — vonkavym i ŭnutranym — Łukašenka padpisaŭ ukaz pra pamiłavańnie Kazulina.
Vonkavy fon: vajna na Kaŭkazie i pahadnieńnie ab supraćrakietach u Polščy. Uvarvańnie ŭ Hruziju pastaviła na vušy ZŠA i Eŭropu, a zhoda Varšavy na amerykanskija antyrakiety aburyła Maskvu.
Usio heta pahražaje novym pachaładańniem u dačynieńniach miž Rasiejaj i Zachadam.
Biełaruski ž kiraŭnik mała taho što nie padtrymaŭ udar «sajuźnikaŭ» pa hruzinach, dyk jašče i robić doŭhačakany krok — vyzvalaje palitviaźnia № 1. Karaciej, sucelny balzam na dušu dziejačam zachodnich demakratyj.
A voś vam unutrany fon: akurat pierad tym, jak byŭ padpisany ŭkaz pra Kazulina, skončyłasia farmavańnie ŭčastkovych kamisij. Apazycyja pralacieła jak fanera nad Paryžam. Z pryblizna 1 300 jaje vyłučencaŭ u kamisii najnižejšaha źviana trapili mieniej za paŭsotni. Adsiavańnie nieparaŭnalna bolšaje, čym pry farmavańni akruhovych kamisij, u jakija, nahadaju, byli ŭłučany kala traciny apazycyjnych vyłučencaŭ: 38 sa 110.
Asablivaje imknieńnie vertykali skamplektavać učastkovyja kamisii sa svaich ludziej tłumačycca, na dumku apanentaŭ ułady, tym, što mienavita hetaje, nizavoje źviano padliku hałasoŭ i jość toj «čornaj skryniaj», ź jakoj vyskokvajuć usie «elehantnyja pieramohi».
Tak što čas vyzvaleńnia Kazulina praličany filihranna. Łord Beł spravu viedaje.
Zaraz, paśla takoha šyrokaha žestu, zachodniki mo' i nia stanuć tak užo prydziracca da składu ŭčastkovych kamisij, kab nie vyhladać drobiaznymi bukvajedami.
Va ŭsiakim razie, hety etap elektaralnaha pracesu apynajecca ŭ cieni, na peryferyi ŭvahi. A kali jašče nieŭzabavie vyjduć na volu Kim z Parsiukievičam!.. A kali u pałatu trapiać kolki tam čałaviek z «adzinaha śpisu»!
Karaciej, bolš-mienš łahodnuju acenku vybaraŭ jość šaniec atrymać małoj kryvioju, nie asłablajučy lejcaŭ.
Zrešty, łord łordam, a i ŭ samoha Alaksandra Łukašenki palityčny niuch vyklučny. Adznačym jašče adzin momant: reverans pierad Zachadam zrobleny akurat napiaredadni sustrečy biełaruskaha kiraŭnika ź Miadźviedzievym u Sočy. Tak što heta adnačasna i padmacoŭvańnie pazycyj u supraćstajańni (ci torhu?) z Maskvoj.
I narešcie, vychad z turmy ambitnaha palityka, jakoha kalehi pa BSDP niadaŭna zavočna pieraviali ŭ hanarovyja staršyni, vyhladaje vypuskańniem ščupaka ŭ apazycyjnuju sažałku. Biez razboraŭ palotaŭ, treba dumać, nie abydziecca. I nia tolki ŭ miežach adnoj partyi. U ADS spakvala budujuć užo plany na prezydenckuju kampaniju. I vyhladaje na toje, što abiedźvie apazycyjnyja fihury vybaraŭ-2006 — Milinkievič dy Kazulin — nia ŭpisvajucca ŭ novyja plany partyjnych stratehaŭ.
Pamiatajecie, aficyjny kiraŭnik pradrakaŭ, što vychad byłoha rektara z kalonii jašče dadaść hałaŭnoha bolu viarchoŭcy tytulnaj apazycyi?
ZY. Zrešty, siužet z hetym ukazam moža mieć dadatkovuju intryhu. Brat Alaksandra Kazulina Ŭładzimier nie vyklučaje, što palitviazień № 1 paprosicca nazad u «Vićbu-3», bo pryncypova nia choča padpisvać papieraŭ, jakija b choć uskosna zaśviedčyli, što jon pryznaje svaju vinavataść. Ihar Rynkievič ža kaža, što vyzvaleńnie mahčymaje i biez anijakaha prašeńnia, vyklučna volaj kiraŭnika dziaržavy.