Arabskija krainy razarvali adnosiny z Kataram, pačynajuć jaho błakadu. Ci budzie vajna i što budzie z cenami na naftu?
dapoŭniena
Adnosiny razarvali šeść krain: AAE, Bachrejn, Jehipiet, Jemien, Livija, Saudaŭskaja Aravija.
AP
Ranicaj u paniadziełak Bachrejn razarvaŭ dypłamatyčnyja suviazi z Kataram, abvinavaciŭšy susiedniuju dziaržavu va ŭmiašańni ŭ svaju ŭnutranuju palityku. Pra heta paviedamlaje Reuters.
Bachrejn zakryje transpartnyja, marskija i pavietranyja znosiny z Kataram na praciahu 24-ch hadzin, a hramadzianam hetaj krainy dajecca 14 dzion na toje, kab pakinuć Bachrejn. Akramia taho, usim dypłamatam Katara dajecca 48 hadzin na viartańnie na radzimu, adznačaje Al Arabiya.
Katar taksama abvinavačvajecca ŭ eskałacyi napružanaści ŭ ŚMI i finansavańni ŭzbrojenych terarystyčnych hrupovak, što moža pahražać biaśpiecy Bachrejna. U Manamie (stalica Bachrejna) takija dziejańni paličyli «hrubym parušeńniem mižnarodnaha prava, nie ličačysia z maralnymi kaštoŭnaściami i pryncypami dobrasusiedstva».
Uśled za Bachrejnam dypłamatyčnyja adnosiny z Kataram razarvała i Saŭdaŭskaja Aravija, jakaja prymie sapraŭdy takija ž miery ŭ dačynieńni da Katara, jak i Bachrejn. Da ich dałučyŭsia Jehipiet, a zatym i Abjadnanyja Arabskija Emiraty (AAE), adznačaje Reuters. Kair razryvaje dypłamatyčnyja adnosiny z Kataram, abvinavaciŭšy krainu ŭ padtrymcy terarystyčnych hrupovak. Jehipiet zakryvaje svaje party i aeraporty dla transpartu Katara.
AAE abvinavacili Katar u «padtrymcy i finansavańni terarystaŭ, ekstremistaŭ i siektanckich arhanizacyj». Abu-Dabi zakryvaje šlachi znosinaŭ z Kataram i daje dypłamatam krainy 48 hadzin na viartańnie na radzimu.
Isłamskaja vajennaja kaalicyja (u joj znachodziacca Jehipiet, Bachrejn, AAE i inš. krainy) pad kiravańniem Er-Ryjada spyniła ŭdzieł Katara ŭ apieracyi suprać «Isłamskaj dziaržavy», paviedamlaje Al Arabiya.
Katar abvinavacili ŭ padtrymcy ID i hrupoŭki «Al-Kaida». U realnaści Katar najbolš padtrymlivaje nie hetych adkrytych terarystaŭ, a «Bratoŭ-musulman», jakija vystupajuć za likvidacyju absalutnych manarchij u rehijonie.
Hałoŭnaja ŭ antykatarskaj kaalicyi — Saudaŭskaja Aravija. Jehipiet zaležyć ad jaje finansava, a Bachrejn — u vajskovym płanie.
Supiarečnaści miž Saudaŭskaj Aravijaj i Kataram vyklikanyja samastojnaj palitykaj apošniaha. Katar maje vialikija hrošy jak bujny pastaŭščyk hazu. I ŭ siłu pierakanańniaŭ svajho «aśviečanaha» manarcha padtrymlivaje prademakratyčnyja ruchi i ŭmieranych isłamistaŭ u roznych krainach isłamskaha śvietu. Akramia taho, Katar vystupaje za prymireńnie, a nie kanflikt ź Iranam. Kansiervatyŭnaja, tradycyjanalisckaja viarchoŭka Saudaŭskaj Aravii bačyć va ŭsim hetym pahrozu.
Katar — malupasieńkaja pa płoščy dziaržava, u 18 razoŭ mienšaja za Biełaruś. Jaje nasielnictva składaje 2,6 młn. Dla paraŭnańnia: nasielnictva Saudaŭskaj Aravii — 33 młn. Ale dziakujučy ahromnistym zapasam nafty j hazu, Katar maje najbolšy VUP na dušu nasielnictva ŭ śviecie.
Pakul ciažka pradkazać, ci vyljecca kanflikt u vajnu. Lubyja vajennyja dziejańni pryviaduć da skačka cen na naftu. U toj ža čas kanflikt biez vajny, naadvarot, najchutčej pryviadzie da rostu pastavak nafty na rynak i padzieńnia cen na jaje, bo Er-Ryjadu i Tehieranu ciažej budzie damovicca.