BCHD i «Havary praŭdu» paspračalisia pra aŭtarstva zorki na emblemach arhanizacyj
Simvały «Havary praŭdu» i Partyi BCHD
Sustaršynia «Biełaruskaj chryścijanskaj demakratyi» Vital Rymašeŭski abvinavačvaje hramadskaje abjadnańnie «Havary praŭdu» ŭ kradziažy łahatypu. Na piačatcy HP vyjaŭlena vaśmikancovaja zorka. Hety ž simvał užo bolš za 10 hadoŭ vykarystoŭvaje BCHD.
Rymašeŭski śćviardžaje, što simvolika chryścijanskich demakrataŭ «ekskluziŭnaja, bo zamaŭlałasia kankretnamu dyzajnieru. I u takim vykanańni nidzie, aproč jak partyjaj BCHD, nie vykarystoŭvałasia». A ŭ «Havary praŭdu», «vidać, z kreatyvam zusim stała kiepska».
Sustaršynia HP Taćciana Karatkievič u razmovie ź Jeŭraradyjo abviarhaje abvinavačańni:
«Heta nie łahatyp «Havary praŭdu», a prosta piačatka. Kali ty jaje zamaŭlaješ, tabie prapanoŭvajuć varyjanty. I ty vybiraješ. Heta prydumlajuć u samoj firmie, tam nad hetym pracujuć dyzajniery».
Pa słovach Taćciany Karatkievič, «Havary praŭdu» tolki raspačynaje raspracoŭku svaich simvałaŭ. Niadaŭna kampanija atrymała rehistracyju ŭ Miniuście, tamu nieŭzabavie jaje čakaje rebrendynh.
Sprečki nakont simvoliki sustaršynia HP ličyć absalutna lišnimi.
«Tak možna i «Pahoniu» pryvatyzavać. I kryčać: «Nie, heta naša!» Heta taki miestačkovy padychod. A treba dumać hłabalna: čym bolš budzie biełaruskaj simvoliki, tym bolš jana budzie pranikać tudy, dzie jaje zaraz niama».
Krychu paźniej Vitalu Rymašeŭskamu adkazaŭ jašče adzin kiraŭnik «Havary praŭdu» Andrej Dźmitryjeŭ
«Hety simvał byŭ u adkrytym katałozie pradpryjemstva «Salvina», što robić piačatki. Tamu nakont «ekskluziŭnaj apracoŭki» kazać niedarečna. Z usich mahčymych malunkaŭ tolki dva było nacyjanalnyja: zorka i arnamient ź dziaržaŭnaha ściaha. Zrazumieła, my vybrali zorku, jakaja dla nas najpierš nacyjanalny simvał, a nie partyjny. Daruj, pra BCHD my navat nie ŭzhadali — dumali hłybiej».
Paśla hetaha kamientaru Rymašeŭski prynios «Havary praŭdu» prabačeńni.