Alaksandar Rar: «Doŭhaterminovaja stratehija maje na mecie abjadnać Rasieju i Biełaruś u adzinuju dziaržavu»
Supracoŭnik Niamieckaj rady zamiežnaj palityki Alaksandar Rar kamentuje dla «NN» apošnija pavaroty ŭ biełaruska-rasiejskich adnosinach.
Supracoŭnik Niamieckaj rady zamiežnaj palityki Alaksandar Rar kamentuje dla «NN» apošnija pavaroty ŭ biełaruska-rasiejskich adnosinach.
«NN»: Što chavajecca za patrabavańniem Rasiei da Biełarusi raspłačvacca ŭ nastupnym hodzie za haz pavodle novych, značna padvyšanych cenaŭ?
Alaksandar Rar: U adnosinach da Biełarusi Rasieja maje karotkaterminovuju i doŭhaterminovuju stratehiju. Doŭhaterminovaja stratehija maje na mecie abjadnać Rasieju i Biełaruś u adzinuju dziaržavu. Zaŭvažu: nia prosta stvaryć sajuznuju dziaržavu, a zabiaśpiečyć «uźjadnańnie». Ale kiraŭnictva Rasiei ŭśviedamlaje, što ŭ bližejšy čas heta naŭrad ci mahčyma ździejśnić. Tamu robiać staŭku na karotkaterminovuju stratehiju – zmusić Biełaruś pajści na jak maha bolš ščylnaje sajuznaje supracoŭnictva, najpierš u ekanamičnych spravach.
Adnak adnačasova stvarajecca ŭražańnie, što Łukašenka viadzie padvojnuju hulniu ŭ adnosinach da Rasiei (darečy, padobna da taho, jak sama Rasieja viadzie padvojnuju hulnu ŭ adnosinach da Zachadu). Naprykład, Łukašenka žadaje, kab Rasieja davała jamu patrebnuju abaronienaść ad NATO, kab padtrymlivała jaho na mižnarodnaj arenie ŭ kanfliktach z Zachadam, ale ź inšaha boku – rezka admaŭlajecca ŭvodzić adzinuju valutu, bo viedaje, što ŭ vyniku hetaha jon zhubić mahčymaść samastojna vyznačać ekanamičnuju palityku ŭ krainie. Rasiei heta ŭsio mienš i mienš padabajecca. Praz padvyšeńnie cenaŭ na haz jana choča dasłać Biełarusi zrazumieły syhnał: ci vy krok za krokam stanoviciesia na šlach palityki abjadnańnia i ŭ vyniku hetaha atrymlivajecie prava karystacca ŭsimi vyhodami adzinaj ekanamičnaj prastory, ci kročycie svaim šlacham, jak Ukraina. Tady vy pavinny płacić inšyja hrošy za enerhanośbity.
«NN»: Heta nia pieršy «hazavy» kanflikt pamiž Rasiejaj dy Biełaruśsiu. Ci damožacca hetym razam Kreml svaich metaŭ?
AR: Kali ŭ pieršy raz Rasieja adklučyła Biełarusi haz, viałosia pra pryvatyzacyju biełaruskich naftapravodaŭ. Tady Biełaruś była zmušanaja pajści ŭ «patrebnym» kirunku, i ciapier praktyčna zhubiła kantrol nad naftapravodami. «Słaŭnafta» była padparadkavanaja intaresam «Sibnafty», i ŭ vyniku hetaha rasiejski ŭpłyŭ u Biełarusi značna ŭzmacniŭsia. I kali Rasieja sapraŭdy pažadaje zmusić Biełaruś hulać pa «ŭkrainskich» praviłach, to joj heta ŭdasca.
«NN»: Eŭraźviaz rychtujecca zamarozić rachunki, źviazanyja ź biełaruskim režymam, ZŠA stvaryli ŭłasny śpis «nieŭjaznych» biełarusich čynoŭnikaŭ i ich rodnych. Ci vypadkovy taki synchronny cisk na Łukašenku i z Zachadu i z Uschodu?
AR: I toj i inšy bok žadajuć paŭpłyvajuć na sytuacyju ŭ Biełarusi paśla vybaraŭ, abodva majuć svaje pazycyi, tamu i dziejničajuć adpaviedna.
Hutaryŭ Aleś Kudrycki, Berlin