Na hramadskaje abmierkavańnie vyniesieny antytytuniovy dekret
10 maja ŭłady vynieśli na hramadskaje abmierkavańnie prajekt antytytuniovaha dekreta. U im, akramia inšaha, pieraličany śpis miescaŭ, jakija chočuć zrabić svabodnymi ad kureńnia zvyčajnych i elektronnych cyharet, piša Tut.by.
Miescy, svabodnyja ad kureńnia, płanujecca padzialić na dźvie katehoryi: z poŭnaj zabaronaj i sa śpiecyjalna pryznačanymi dla kureńnia miescami.
Da pieršaj katehoryi dekret adnosić lifty i dapamožnyja pamiaškańni šmatkvaternych damoŭ i internataŭ (u tym liku ahulnyja bałkony), dziciačyja placoŭki, plažy, terytoryi dziciačych letnich łahieraŭ, prypynki i terytoryju ŭ radyusie 10 mietraŭ ad ich, hramadski transpart (u tym liku ciahniki) i asabistyja aŭtamabili, kali ŭ ich prysutničajuć dzieci da 14 hadoŭ.
Da druhoj katehoryi adnosiacca kramy, handlovyja centry, rynki, kafe i restarany, vytvorčyja pamiaškańni, terytoryi škoł i VNU, čyhunačnyja płatformy, vakzały i aeraporty. Pry hetym jurydyčnyja asoby, jakim naležać pieraličanyja vyšej abjekty, mohuć stvarać miescy, pryznačanyja dla kureńnia.
Na abjektach, dzie kureńnie zabaronienaje, dekret zahadvaje raźmiaščać śpiecyjalny znak.
Nahadajem, zhodna z Kodeksam ab administracyjnych pravaparušeńniach, za kureńnie ŭ nienaležnym miescy pahražaje štraf da čatyroch bazavych vieličyń.
Taksama dekret pryraŭnoŭvaje elektronnyja cyharety da zvyčajnych, a značyć, na ich buduć raspaŭsiudžvacca tyja ž abmiežavańni. U pryvatnaści, jak i cyharety, ich nielha budzie vykładvać na vitrynach i pradavać niepaŭnaletnim.
Adpravić svaje prapanovy pa dapracoŭcy dekreta «Ab dziaržaŭnym rehulavańni abarotu tytuniovych vyrabaŭ i elektronnych sistem kureńnia» usie achvotnyja mohuć praz hetuju formu.
Nahadajem, antytytuniovy zakon byŭ padrychtavany ministerstvam achovy zdaroŭja jašče ŭ 2013 hodzie. Ale da hetaha času nie pryniaty — jaho pryniaćcie niekalki razoŭ adkładałasia. U prajekcie dakumienta prapisanyja radykalnyja miery pa baraćbie z tytuniom: zabarona na kureńnie ŭ hramadskich miescach, poŭnaja zabarona na naŭprostuju i ŭtojenuju rekłamu tytuniovych vyrabaŭ, zabarona na vykładku cyharet u kramach, uviadzieńnie zastrašvalnaj vyjavy na ŭpakoŭcy i, hałoŭnaje, — pavyšeńnie akcyzaŭ i nieminučaje padaražeńnie cyharet.