U Mahilovie DAI pakarała kiroŭcu za bieła-čyrvona-biełuju nalepku
Žychara Mahilova Alaksieja Kuźmina pryznali vinavatym u parušeńni praviłaŭ darožnaha ruchu i abaviazali spłacić pałovu bazavaj vieličyni (11,5 rubla) štrafu. Pryčyna — bieła-čyrvona-biełaja nalepka na mašynie. Svajoj viny kiroŭca nie pryznaje i źbirajecca pakarańnie abskardžvać.
Nalepka, za jakuju aŭtaŭładalnika aštrafavali
16 krasavika apoŭnačy Alaksieja spyniŭ supracoŭnik DAI za pieravyšeńnie chutkaści. U chodzie pravierki dakumentaŭ i samoj mašyny na jaho było składziena niekalki pratakołaŭ, u tym liku za bieła-čyrvona-biełuju nalepku ź litarami «BY». Inspektar arhumentavaŭ pretenzii, što nalepka «nieŭstanoŭlenaha» ŭzoru. Pavodle milicyjanta, jana maje być čorna-biełaj.
«Ja liču, što milicyjant pryčapiŭsia da nalepki, bo jamu nie spadabalisia kolery, — kaža Alaksiej. — Kali b nalepka była čyrvona-zialonaj, to i pretenzijaŭ nie było b. Biezumoŭna, hetaja sytuacyja mianie aburaje. Pra takoha rodu incydenty mianie ŭ kramie nie papiaredžvali».
Alaksiej Kuźmin
Pierakanać inspektara ŭ tym, što nalepka nabytaja ŭ Biełarusi, nie parušaje praviłaŭ, Alaksiej nia zmoh, i jaho vyklikali na razhlad pratakołaŭ u Mahiloŭskaje abłasnoje ŭpraŭleńnie dziaržaŭnaj aŭtainspekcyi.
Jaho supracoŭniki spasłalisia na 13-ju častku artykułu 194 Praviłaŭ darožnaha ruchu, pavodle jakoha da darožnaha ruchu dapuskajucca transpartnyja srodki «z vonkava bačnymi nalepkami (vyjavami)», jakija adpaviadajuć vyznačanym uzoram. Inšaja symbolika pryraŭnoŭvajecca da reklamy, jakuju treba rehistravać.
Dazvolenyja znaki pavodle praviłaŭ darožnaha ruchu
«Palityčnyja baki tut nijakija nie zakranajucca. My zajmajemsia vyklučna pytańniami harantavańnia biaśpieki darožnaha ruchu. Vy kiroŭca, i pavinny trymacca praviłaŭ», — zaznačyŭ adzin z supracoŭnikaŭ upraŭleńnia DAI.
Alaksiej nie pahadziŭsia z pakarańniem i zajaviŭ, što jaho budzie abskardžvać. Jon ličyć abraźlivym dla siabie, kali pa horadzie raźjaždžaje niamała mašyn z «hieorhijeŭskimi stužkami» na bartach, jakich DAI nie zaŭvažaje.
«Nalepka «BY» na majoj mašynie takoj ža formy, jak u knižcy, jakuju pakazvali mnie ŭ DAI. U jaje tolki inšy koler. Ja pierakanany, što jon nie zabaronieny. Budziem abskardžvać hetaje rašeńnie razam z pravaabaroncami. Jany, dumaju, mnie dapamohuć», — skazaŭ paśla razhladu pratakołu Alaksiej Kuźmin.
Upraŭleńnie DAI Mahilova
U mienskaj kramie «Symbal.by» adznačyli, što pretenzijaŭ da bieła-čyrvona-biełych nalepak nie było. Jany karystajucca popytam, i ŭ stalicy niamała mašyn z takimi znakami. Što da vypadku ŭ Mahilovie, to, jak adznačyli ŭ kramie, jaho varta razhladać jak vyklučeńnie z ahulnaj sytuacyi.
Za takija znaki nie štrafujuć. Choć ich siarod dazvolenych u praviłach darožnaha ruchu niama