AAN vyjaviła ŭ Afrycy paŭnočnakarejskuju zbroju i vajskoŭcaŭ
Miratvorcy Arhanizacyi Abjadnanych Nacyj (AAN) vyjavili ŭ Afrycy paŭnočnakarejskuju zbroju, jakaja znachodzicca pad abmiežavalnymi mierami mižnarodnaj arhanizacyi.
Heta vynikaje z ŭnutranaha dakładu AAN, ź jakim aznajomiłasia Associated Press.
Jak vyśvietliła hrupa ekśpiertaŭ AAN pa Paŭnočnaj Karei, u žniŭni 2016 hodu kala 30 tys. hranatamiotaŭ znajšli schavanymi pad žaleznaj rudoj na hruzavym sudnie, jakoje nakiroŭvałasia pa Sueckim kanale ŭ Jehipiet.
Kudy zbroju źbiralisia dastavić, ekśpierty nie vyjavili, adnak padkreślili, što heta «samy vialiki zachop bojeprypasaŭ u historyi sankcyj» suprać Paŭnočnaj Karei.
Za miesiac da hetaha, havorycca ŭ dakładzie, dziaržava — člen AAN pierachapiła pavietranuju pieravozku pryboraŭ vajennaha pryznačeńnia dla radyjosuviazi, pryznačanuju dla niejkaj kampanii ŭ Erytrei.
Heta ŭžo druhi raz, kali arhanizacyja vyjaŭlaje fakty vajennaha ekspartu z Paŭnočnaj Karei ŭ Erytreju, što «paćviardžaje supracoŭnictva ŭ śfiery ŭzbrajeńniaŭ pamiž dźviuma krainami».
Taksama arhanizacyja vyjaviła paŭnočnakarejskich vajskoŭcaŭ u Anhole i Uhandzie.
Hadavaja spravazdača, padrychtavanaja hrupaj ekśpiertaŭ AAN pa Paŭnočnaj Karei, pakazvaje, što Pchieńjan uchilajecca ad sankcyj, uviedzienych u dačynieńni da jaho jadziernaj i rakietnaj prahram, zajmajecca treniroŭkaj svaich vajskoŭcaŭ i pastaŭlaje ŭzbrajeńnie.
Na dumku ekśpierta pa Paŭnočnaj Karei ŭ Instytucie mižnarodnaj ekanomiki Pietersana Marka Nołana, KNDR «vykarystoŭvaje afrykanskija krainy ŭ jakaści stratehii abychodu».
Jon rastłumačyŭ, što Pchieńjan naładžvaje svaju vajskovuju prysutnaść u Afrycy i prajaŭlaje cikavaść da handlu tam dla taho, kab skaracić svaju zaležnaść ad Kitaja.
U dačynieńni da Paŭnočnaj Karei dziejničajuć sankcyi jak mižnarodnych arhanizacyj i sajuzaŭ, takich jak AAN i ES, tak i asobnych krain, u tym liku ZŠA i Rasii. Abmiežavalnyja miery byli ŭviedzienyja paśla šmatlikich jadziernych i rakietnych vyprabavańniaŭ, jakija pravodzić Pchieńjan. Sami sankcyi zakranajuć ekanamičnuju, finansavuju, vajennuju, a taksama dypłamatyčnuju i palityčnuju śfiery.