Kurejčyk zdymie chorar «Vampiry» pra žachi na kupalskuju noč
Pradziusary Viktar Łabkovič, Andrej Kurejčyk i Siarhiej Jakuboŭski abviaścili pra pačatak kastynhu ŭ novy prajekt — biełaruski moładzievy chorar «Vampiry» [aryhinalnaja nazva — «Upyri»]. Tvorčaja hrupa šukaje maładych, cikavych hałoŭnych hierojaŭ, jakija zmohuć jarka i niečakana zhulać u žanry choraru.
Rabočy varyjant postara.
Vytvorčaściu zojmiecca kinakampanija «Naša kino», jakaja abjadnała siły troch niezaležnych ajčynnych pradziusaraŭ.
— Paasobku tut nie vyžyć, i my vyrašyli abjadnać svaje napracoŭki i techničnyja mahčymaści, kab prapanavać prajekty, jakija buduć cikavyja i miascovamu prakatu, i mižnarodnamu. Tak naradziłasia kampanija «Naša kino», — raspavioŭ Andrej Kurejčyk.
Scenaryst i pradziusar Andrej Kurejčyk.
«Upyri» — rabočaja nazva dla pieršaha prajekta kamandy «Naša kino». Režysioram stanie klipmiejkier i režysior Maks Siry (klipy dla hurtoŭ «J-Mors», «Bieź Bileta»), apieratarami — Alaksandr Alejnikaŭ («Dušy miortvyja») i Arciom Jakimaŭ («Vyšej za nieba»).
Nad scenarom pracavali Siarhiej Jakuboŭski, Andrej Kurejčyk i Maksim Siry.
Pavodle siužeta, mižnarodnaja moładzievaja kampanija traplaje ŭ lasnuju hłybinku na tajemnaje voziera i sutykajecca tam ź mistyčnym žacham, jaki adzin raz na hod sparadžajecca ŭ Kupalskuju noč.
— Ideja ŭźnikła ŭ mianie na asnovie takoj źjavy, jak «biełaruskija Maldyvy» — ja kažu pra salihorskija krejdavyja karjery, — raspaviadaje pradziusar prajektu Siarhiej Jakuboŭski. — Vakoł ich chodzić stolki niebylic i historyj, što zachaciełasia zasnavać na hetym siužet.
Zdymki moładzievaha choraru płanujecca skončyć u červieni, a mižnarodny i respublikanski reliz zrabić vosieńniu 2017 hoda.
Film znachodziacca na stadyi pošuku finansavańnia. Kurejčyk adznačaje, što biudžet prajekta pavinien ŭkłaścisia plus-minus u 50 tysiač jeŭra. Heta moža być inviestavańnie, product placement, ale ni ŭ jakim razie nie dziaržaŭnyja hrošy.
— Ja liču, što Ministerstva kultury maje nakiroŭvać dziaržaŭnyja hrošy na prajekty, źviazanyja z kulturaj. My ž źbirajemsia rabić kamiercyjnaje kino — jano maje samo siabie akuplać biez dapamohi dziaržavy. Inšaja sprava, što dziaržstruktury nie pavinny pieraškadžać.