U Maskvie pačaŭsia sud pa poźvie da pres-sakratara MZS Rasii za krytyku antybiełaruskich artykułaŭ
Preśnienski sud Maskvy pryciahnuŭ u jakaści suadkazčyka pres-sakratara MZS Rasii Maryju Zacharavu pa poźvie ahienctva Regnum z patrabavańniem abvierhnuć raspaŭsiudžanuju raniej infarmacyju pra toje, što ŭ artykułach hetaha ŚMI biełarusaŭ nazyvali «niedanarodam», paviedamlaje TASS.
Maryja Zacharava. Fota TASS
Nahodaj dla zvarotu ŭ sud pasłužyła vykazvańnie aficyjnaha pradstaŭnika MZS RF Maryi Zacharavaj na bryfinhu 27 śniežnia 2016 hoda ab tym, što aryštavanyja ŭ Biełarusi za raspalvańnie nacyjanalnaj varožaści aŭtary ahienctva Regnum vykarystoŭvali ŭ svaich publikacyjach słova «niedanarod».
«My padzialajem toje, što było skazana pasłom, što ŭžyvańnie takich słoŭ, jak «niedanarod» abo «niedadziaržava» ŭ dačynieńni da Biełarusi i biełarusaŭ, — heta niedapuščalna».
Regnum aburylisia słovami Zacharavaj. Tam nie asprečvali, što Biełaruś u ich artykułach nazyvali «niedadziaržavaj», ale asprečyli zhadvańnie «niedanaroda» ŭ dačynieńni da biełarusaŭ.
Ab pryciahnieńni Zacharavaj prasili pradstaŭniki pazoŭnika. «Vykazvańnie, jakoje my asprečvajem, naležyć mienavita Zacharavaj, tamu my chadajničajem ab pryciahnieńni jaje da słuchańniaŭ spravy», — skazaŭ juryst Regnum Valeryj Šachaŭ.
Pradstaŭnik MZS u sudzie vystupaŭ suprać pryciahnieńnia Zacharavaj da spravy. «My vystupajem nie tolki suprać pryciahnieńnia Zacharavaj, ale i suprać samoha pryniaćcia pozvy jak padadzienaj niepravamierna», — skazaŭ juryst viedamstva.
Sud abaviazaŭ pradstaŭnika MZS apaviaścić Zacharavu ab pryciahnieńni jaje ŭ jakaści suadkaźnika i dać joj vybar — źjavicca na pasiadžeńnie abo pradstavić piśmovuju zajavu pra niežadańnie asabista ŭdzielničać u pracesie. U suviazi ź nieabchodnaściu apaviaścić novaha adkazčyka sud pieranios praciah dasudovaj padrychtoŭki na 3 sakavika.
Jak raniej paviedamlałasia, u pačatku śniežnia Śledčy kamitet zatrymaŭ adrazu troch kałumnistaŭ rasijskich vydańniaŭ Regnum, Lenta.ru i EADaily. Adzin ź ich minčanin, vykładčyk BDUIR Juryj Paŭłaviec, druhi — školny achoŭnik z Bresta Dźmitryj Alimkin, treci — minski karespandent Regnum Siarhiej Šyptenka. Jany prachodziać pa kryminalnaj spravie ab raspalvańni nacyjanalnaj varožaści.