Sieviaryniec zanios u Administracyju prezidenta 180 tysiač łajkaŭ z Adnakłaśnikaŭ
Sustaršynia arhkamiteta pa stvareńni partyi Biełaruskaja chryścijanskaja demakratyja Pavieł Sieviaryniec 15 lutaha pieradaŭ u Administracyju prezidenta zvarot z patrabavańniem admieny dekreta «ab darmajedach», pieradaje BiełaPAN.
Da zvarotu jon prykłaŭ skrynšot sa staronki telekanała «Biełsat» u sacyjalnaj sietcy «Adnakłaśniki», dzie karystalnikam prapanoŭvałasia pastavić łajk, kali jany vystupajuć suprać dekreta. Zapis sabraŭ bolš za 180 tysiač adznak.
Pa słovach palityka, u zvarocie źmieščanaje patrabavańnie da Alaksandra Łukašenki, jaho administracyi i da ŭradu pajści ŭ adstaŭku. Taksama kiraŭniku dziaržavy prapanujecca admianić dziejańnie «dekreta ab darmajedach», pryznać jaho «aktykanstytucyjnaść i antynarodnaść». Zvarot pryniali i zarehistravali.
Sieviaryniec zajaviŭ, što sam jon nie padpadaje pad dziejańnie dekreta, bo źjaŭlajecca čalcom Sajuza biełaruskich piśmieńnikaŭ. «Ale ŭ mianie jość šmat siabroŭ, jakim absalutna niespraviadliva takija pozvy pieradali», — skazaŭ palityk.
Darečy, padtrymać Paŭła Sieviarynca pryjšła aktyvistka apazicyi Nina Bahinskaja. Pakul prysutnyja čakali viartańnia Sieviarynca z Administracyi prezidenta, joj stała błaha i jana ŭpała, Bahinskuju zabrała chutkaja.