«Staŭki — uniz, stanok — nie čapać». Da čaho damovilisia na naradzie-dyskusii ŭ Łukašenki
Klučavyja rašeńni pa dalejšym raźvićci ekanomiki mohuć być pryniatyja padčas spravazdačy ŭrada ŭ Alaksandra Łukašenki, u treciaj dekadzie lutaha. Pra heta TUT.BY raspaviali krynicy, znajomyja z chodam našumiełaj piatničnaj narady.
U liku zaprošanych na naradu była hrupa ekśpiertaŭ: byłyja staršyni praŭleńnia Nacbanka Piotr Prakapovič i Nadzieja Jermakova, ich namieśniki, a ciapier kiraŭniki kamiercyjnych bankaŭ Juryj Ałymaŭ i Mikałaj Łuzhin, kiraŭnik Banka raźvićcia Siarhiej Rumas i rektar BDEU Uładzimir Šymaŭ. Fota: pres-słužba prezidenta Biełarusi
Nahadajem, što klučavym kamieniem spatyknieńnia stała «maštabnaja hrašovaja emisija». «U materyjałach na TUT.BY, jakija stali anonsam narady, ŭsio źviałosia da ŭklučeńnia drukarskaha stanka. Adnak Piatro Piatrovič Prakapovič nie prapanoŭvaŭ zapuścić drukarski stanok. U jaho liście pryvodzicca analiz dvuch hadoŭ dziejnaści ŭrada — padzieńnie VUP, inviestycyj, źnižeńnie dachodaŭ, ale ničoha nie prapanujecca. Stabilizacyja zaciahnułasia — heta fakt, i ŭrad heta razumieje. Reformy zašytyja ŭ prahramu z MVF, ale pa joj jasnaści da hetaha času niama», — raspaviadaje krynica.
«Siarod jaho prapanoŭ — pavyšeńnie dastupnaści kredytaŭ, zbližeńnie ich ŭzroŭniu ź inflacyj; stymulavańnie budaŭnictva i indyvidualnaha žyllovaha u pryvatnaści; aktyvizacyja ŭnutranych inviestycyj; miery pa dasiahnieńni dadatnaha salda pa biahučym rachunku», — kaža znajomy Prakapoviča. Pry vykanańni hetych umoŭ eks-kiraŭnik Nacbanka ličyć, što «niama nieabchodnaści ŭ prahramie z MVF».
«Nie ŭsio biassprečna, ale i ničoha «drukarskaha» ŭ prapanovach Prakapoviča sapraŭdy niama. Tym bolš, što ciapier takaja zališniaja likvidnaść, navošta drukavać», — paćviardžaje surazmoŭca, znajomy z chodam narady. Pavodle jaje słoŭ, adbyłasia dobraja dyskusija. «Prezident uvažliva ŭsich vysłuchaŭ, ale nijakich rašeńniaŭ na naradzie nie prymałasia, dy i nie płanavałasia. Asnoŭnaja razmova budzie na spravazdačy ŭrada ŭ treciaj dekadzie lutaha. Ale [Alaksandr Łukašenka] papiaredziŭ, što ŭsie pavinny z hetaj dyskusii zrabić vysnovy», — skazaŭ surazmoŭca.
Piotr Prakapovič pisaŭ na imia prezidenta jak staršynia Rady pa raźvićci pradprymalnictva, adznačajuć surazmoŭcy. Pytańnie dastupnych kredytaŭ — «adna z asnoŭnych prablem biełaruskaha biznesu, nie tolki pramysłovych hihantaŭ, ale i pryvatnaha siektara». Krynica nahadała, što ŭ lutym 2015 hoda Prakapovič nieŭzabavie paśla sychodu z pasady vice-premjera zamiest siabie prapanavaŭ na pasadu kiraŭnika Rady Vasila Maciušeŭskaha jak čałavieka, jaki zdolny «adrazu prymać rašeńni». Adnak pieršy vice-premjer nie vyjaviŭ asablivaha žadańnia stać pasiarednikam pamiž biznesam i ŭładaj, kažuć krynicy. «Prakapoviču nie treba pasad. Čałaviek užo na piensii. Ale jamu nieabyjakavy los krainy i ekanomiki», — kaža surazmoŭca.
Jašče adzin surazmoŭca, kamientujučy naradu, skazaŭ, što «siońnia šmat nieviadomych paramietraŭ, kab raspracoŭvać dakładnyja płany na budučyniu, — kolki nafty i pa jakoj canie my budziem pierapracoŭvać, ci pojdziem my na prahramu z MVF i ci atrymajem kredyt i hetak dalej». «Karektavać svoj ekanamičny śvietapohlad pavinny nie tolki ŭrad i Nacbank, ale i prezident. Nie treba zaraz vynachodzić rovar i vyšukvać niestandartnyja rašeńni. Dla pačatku varta nie piarečyć prostym ekanamičnym zakonam: nie davać hrošaj na prajadańnie i pustyja prajekty, admovicca ad pierakryžavanaha subsidziravańnia, nie zatavarvać składy i inšaje. Kali jość mahčymaść zaniać u MVF pad dobry pracent, dyk čamu b joj nie skarystacca. Reformy ž razumnyja prapanujucca. Pry hetym varta vyrašyć naftahazavyja pytańni z Rasijaj, jakaja ŭsio jašče zastajecca našym klučavym handlovym partnioram», — skazaŭ ekśpiert.
Jon prahnazuje, zychodziačy z dyskusii na naradzie, što «nichto nie zacikaŭleny abvastrać situacyju». «Kali nie budzie fors-mažoru, to staŭki pa kredytach pojduć uniz chutčej. Nacbank naŭrad ci vystaić pierad hetym. Urad budzie vymušany zabiaśpiečyć rost [VUP]. Choć by minimalny. Hod, moža być, i praciahniem. Ale heta znoŭ ža, kali nie budzie nijakaha fors-mažoru. Z kredytam MVF budzie praściej. Kanflikt z Rasijaj ci prasiadańnie syravinnych i ekspartnych rynkaŭ, naadvarot, dadaść ciažkaści», — reziumavaŭ surazmoŭca.