Štrafy za nienaležnuju rekłamu lekaŭ chočuć pavialičyć
U 2016 hodzie 54% parušeńniaŭ rekłamnaha charaktaru tyčylisia publikacyj u internecie. U minułym i ŭ pačatku hetaha hoda było zabłakavana čatyry sajty, jakija pradajuć preparaty pad vyhladam lekavych, i jašče dva — pa prodažy balničnych listoŭ, raspaviali ŭ Ministerstvie antymanapolnaha rehulavańnia i handlu. Pra heta piša tut.by.
Pa zakonie, leki ŭ Biełarusi možna pradavać tolki ŭ aptekach. Realizacyja preparataŭ, u tym liku BADaŭ, praź internet niezakonnaja, padkreśliła načalnik upraŭleńnia farmaceŭtyčnaj inśpiekcyi i arhanizacyi lekavaha zabieśpiačeńnia Ministerstva achovy zdaroŭja Ludmiła Ravuckaja.
Adnak mienavita internet zastajecca hałoŭnaj krynicaj raspaŭsiudžvańnia falšyvych lekaŭ. Čaściej za ŭsio rekłamujuć srodki dla pachudzieńnia i pavyšeńnia patencyi.
— Abiacajuć viarnuć zrok, mužčynskuju siłu, vyklučajučy ciažkaści na šlachu da vyzdaraŭleńnia. Čałaviek na heta kuplajecca, tamu što hatovy da cudu, kali, siedziačy na kanapie možna ačuniać. Čaściakom takija preparaty kaštujuć vielizarnych hrošaj, majuć pabočnyja dziejańni i raźličanyja na ludziej pažyłoha ŭzrostu. Ale pa preparat treba iści tolki da doktara. Toje, što pradajuć u internecie, heta nie bułačka, a, moža być, jad, i nastupstvy mohuć adbicca nie adrazu, — patłumačyła namieśnik načalnika Hałoŭnaha ŭpraŭleńnia arhanizacyi miedycynskaj dapamohi, načalnik adździeła pieršasnaj miedycynskaj dapamohi Ministerstva achovy zdaroŭja Ludmiła Žylevič.
Pa słovach śpiecyjalistaŭ, farmaceŭtyčnaja inśpiekcyja manitoryć takoha rodu rekłamu i apaviaščaje MARH, a taksama MUS — jak u vypadku z rekłamaj psichatropnych rečyvaŭ pad vyhladam lekaŭ.
— Źjaŭlajucca abjavy, sajty pra cudadziejnyja srodki. Voś niadaŭna majmu susiedu kinuli ŭ paštovuju skryniu rekłamu pad vyhladam haziety «Dziŭnaja siła pryrody», dzie abiacajuć niejmaviernyja rečy, navat drukujuć intervju z pažyłymi ludźmi, jakija nibyta vylečylisia ad cukrovaha dyjabietu kropielkami. Na pavierku akazvajecca, što nijakich intervju nie było. Takaja rekłama pa-za zakonam, niemahčyma kantralavać jakaść takich srodkaŭ, umovy zachoŭvańnia i davać harantyi. Bolš taho, u internecie pradavaŭsia preparat dla pachudzieńnia, zabaronieny da vykarystańnia ŭ našaj krainie. Vytvorca i sam źniaŭ jaho z vytvorčaści, bo preparat vyklikaje ŭskładnieńni: kiepska dziejničaje na sardečna-sasudzistuju sistemu. Pytańnie, chto tady pradaje taki preparat?
U viedamstvie rastłumačyli, što abjavy na forumach abo ŭ sacyjalnych sietkach ab prodažy nabytych u aptecy, ale nie vykarystanych lekaŭ taksama źjaŭlajucca rekłamaj. Čałaviek, jaki raźmiaściŭ takuju abjavu, moža być aštrafavany na sumu ad 5 da 30 bazavych vieličyń. Kali preparat addajecca biaspłatna, rekłamaj heta ŭžo nie budzie. Ale ŭ Ministerstvie achovy zdaroŭja źviarnuli ŭvahu, što ŭ takim vypadku nichto nie moža harantavać, ci adpaviadaje preparat ŭpakoŭcy i ci nie naniasie jon škody.
Načalnik siektara kantrolu za rekłamaj upraŭleńnia abarony pravoŭ spažyŭcoŭ i kantrolu za rekłamaj MARH Ina Haŭrylčyk nahadała, što za raźmiaščeńnie niezakonnaj rekłamy praduhledžanaja taksama administracyjnaja adkaznaść i ŭładalnika sajta, i rekłamadaŭca.
IP vypłačvaje štraf ad 10 da 40 bazavych vieličyń, jurydyčnaja asoba — ad 20 da 50 bazavych vieličyń.
Pa słovach Iny Haŭrylčyk, ciapier abmiarkoŭvajecca pavyšeńnie pamieru štrafaŭ za nienaležnuju rekłamu, u tym liku dla fizičnych asob.