Apazicyjnyja partyi płanujuć «Marš niedarmajedaŭ»
Arhanizatary «Maršu niedarmajedaŭ» suprać dekreta prezidenta № 3 «Ab papiaredžańni sacyjalnaha ŭtrymanstva», zapłanavanaha na 15 sakavika, majuć namier harantavać maksimalnuju biaśpieku jaje ŭdzielnikam, piša BiełaPAN.
Pra heta było zajaŭlena pradstaŭnikami arhkamiteta pa praviadzieńni mierapryjemstva 23 studzienia na pres-kanfierencyi ŭ Minsku.
U arhkamitet «Maršu niedarmajedaŭ» (raniej akcyja anansavałasia jak «Marš darmajedaŭ») uvachodziać dzieviać arhanizacyj: Biełaruskaja partyja levych «Spraviadlivy śviet», Abjadnanaja hramadzianskaja partyja, ruch «Za Svabodu», arhkamitety pa stvareńni partyi «Biełaruskaja chryścijanskaja demakratyja», Partyi pracoŭnych i partyi «Nadzieja», Biełaruskaja sacyjał-demakratyčnaja partyja (Hramada), Biełaruskaja partyja «Zialonyja» i hramadzianskaja kampanija «Naš dom».
Zajaŭka na praviadzieńnie akcyi budzie pieradadzienaja ŭ Minharvykankam 30 studzienia.
Jaje inicyjatary, paviedamiŭ staršynia AHP Anatol Labiedźka, majuć namier prasić ułady dazvolić šeście ad budynka Nacyjanalnaj akademii navuk u napramku płoščy Banhałor.
«Pa hetym maršrucie ŭłady ŭžo davali dazvoł na praviadzieńnie šeściaŭ. Nam važna, kab u akcyi ŭziali ŭdzieł jak maha bolš novych ludziej. Tamu my hatovyja pajści na niejkija patrabavańni ŭładaŭ, navat kali ŭ dušy i nie zhodnyja ź imi», — skazaŭ palityk.
Adkazny sakratar BCHD Dzianis Sadoŭski nahadaŭ, što ŭ krainie stvorany arhkamitet pa praviadzieńni jašče adnoj akcyi — «Maršu razzłavanych biełarusaŭ» suprać niezakonnych paboraŭ uładaŭ, jakaja inicyjujecca Biełaruskim nacyjanalnym kanhresam i pryznačanaja na 17 lutaha.
«Čym bolš akcyj suprać dekreta № 3, tym lepš. Da taho ž u maršaŭ rozny farmat, — zaznačyŭ Sadoŭski. — «Marš razzłavanych biełarusaŭ» — bolš radykalny. «Marš niedarmajedaŭ» — dla tych, chto pakul nie hatovy vychodzić na radykalnyja akcyi, ale hatovy abaraniać svaje pravy biez pahrozy być zatrymanym abo aštrafavanym».
Pradstaŭniki arhkamiteta «Maršu niedarmajedaŭ» taksama paviedamili, što akcyi suprać dekreta ab papiaredžańni sacyjalnaha ŭtrymanstva płanujecca pravieści i ŭ rehijonach. U pryvatnaści, vuličnyja akcyi rychtujucca na 19 lutaha ŭ Mahilovie i Homieli.