«Łahiery dla mihrantaŭ»: tonkaja psichałahičnaja śpiecapieracyja suprać Biełarusi?
«Pakt ź biełaruskim dyktataram» — taki artykuł źjaviŭsia ŭ niamieckaj haziecie «Tahiescajtunh» 13 studzienia.
U toj ža dzień jaho pierakłaŭ sajt «Inośmi.ru» i masava pieradrukavali rasijskija vydańni.
Eadaily.com: ŚMI: ES postroit v Biełoruśsii cientry po raźmieŝieniju biežienciev
Odnokłaśśniki/cpbelaru: ŚMI: Nie popavšich v Jevropu mihrantov ostaviat v Biełarusi
Belarusiya.com: V Minskie postrojat cientr raźmieŝienija mihrantov?
Chajp padchapili biełaruskija resursy:
Narodnaja vola: Biełaruś primiet mihrantov iz Sirii.
Narešcie, sam ministr zamiežnych spraŭ Rasii vykazaŭ zaniepakojenaść: «Pahadnieńnie ES i Biełarusi ab łahierach dla mihrantaŭ vyklikaje pytańni».
Pres-sakratar MZS Biełarusi Dźmitryj Mirončyk vymušany byŭ apraŭdvacca: Biełaruś zaraz robić «roŭna toje ž samaje, što i Rasija krychu raniej».
«Adzinaje adroźnieńnie — na toj momant Rasijskaj Fiederacyjaj ŭžo było zaklučanaje pahadnieńnie ab readmisii ź ES i, adpaviedna, u jaje było abaviazacielstva prymać nielehalnych mihrantaŭ, jakija trapili ŭ Jeŭrasajuz praz rasijskuju terytoryju. U nas zaraz takoha abaviazacielstva niama, heta značyć my pracujem z ulikam rasijskaha dośviedu i dla papiaredžańnia mahčymych prablem», — skazaŭ Mirončyk.
Vymušanaje było supakojvać hramadskuju dumku i Ministerstva ŭnutranych spraŭ: «Važna adznačyć, što havorka idzie tolki pra inšaziemcaŭ — niezakonnych mihrantaŭ, zatrymanych u našaj respublicy, siryjskija albo inšyja ŭciekačy ź ES u ich raźmiaščacca nie buduć», — havorycca ŭ paviedamleńni viedamstva.
U pryncypie, sprava prostaja. Havorka idzie pra budaŭnictva centraŭ dla časovaha pražyvańnia mihrantaŭ. Takija i ciapier isnujuć u Biełarusi — prośbitaŭ palityčnaha prytułku, naprykład, raźmiaščajuć u Hatavie pad Minskam.
Havorka idzie pra pabudovu takich abjektaŭ, jakija zabiaśpiečać hodnyja ŭmovy žyćcia dla tych ludziej, jakija padlahajuć departacyi, na pieryjad da departacyi. Jeŭropa finansuje pabudovu takich abjektaŭ u susiednich krainach z pačućcia humanizmu. Biełarusi ž jano vyhadna — my ŭsio adno vymušanyja tych ludziej raźmiaščać na pieryjad da vyrašeńnia ich statusu, to prynamsi atrymajem hrošy na damy dla ich.
Značnuju dolu mihrantaŭ, što zaviśli ŭ Biełarusi, składajuć uciekačy z Rasii, u pryvatnaści, Čačni. Fota Iryny Arachoŭskaj, Bieraście.
Varta adznačyć, što hetaja damoŭlenaść dasiahnutaja ŭ ramkach doŭhaha pieramoŭnaha pracesu miž ES i Biełaruśsiu ab palahčeńni vizavaha režymu.
Dasiahnuć jaho možna pry ŭmovie zaklučeńnia damovy pra readmisiju nielehalnych mihrantaŭ — h.zn. viartańnia niezakonnych mihrantaŭ nazad pa maršrucie, jakim jany prybyli. Mienavita z prykidkaj pad stvareńnie ŭmoŭ dla hetaha Jeŭrasajuz daje srodki na tyja centry ŭtrymańnia.
Havorka nie idzie pra stvareńnie ŭ Biełarusi adstojnika dla mihrantaŭ, što prybyli ŭ Jeŭrasajuz inšymi darohami. Miž tym u publikacyjach rasijskich ŚMI ŭtrymlivaŭsia mienavita taki namiok.
Važna adznačyć taksama, što anałahičnaja damova pra readmisiju z Rasijaj zaklučanaja ŭ 2013 hodzie.
I «Tahiescajtunh», i, asabliva, rasijskija resursy padali spravu z takim padtekstam ci, prynamsi, namiokam, niby havorka idzie nie pra techničnuju damoŭlenaść, a pra namier Alaksandra Łukašenki dabicca palapšeńnia adnosin ź Jeŭrasajuzam uzamien za pieratvarenńnie Biełarusi ŭ adstojnik. Takaja padača ŭkładajecca ŭ mahistralnuju rasijskuju strašyłku apošniaha času: «Łukašenka pierabiežčyk; Biełaruś sychodzić u Jeŭropu; heta pryniasie nieźličonyja biedstvy bratniamu biełaruskamu narodu».
Zirnicie na ilustracyi da temy, jakija zadajuć usprymańnie:
Aryhinalny artykuł «Tahiescajtunh».
Padača toj samaj infarmacyi na Eadaily — resursie, jaki niadaŭna apublikavaŭ artykuł pra ministra zamiežnych spraŭ Biełarusi, raźličany na stvareńnie skandału.
Padača toj samaj infarmacyi na Belarusiya.com.
U dakumiencie Jeŭrakamisii havorka idzie pra nievialikija budynki dla nievialikaj kolkaści ludziej. Miž tym na karcinkach my bačym tysiačnyja tłumy siryjcaŭ — dla jakich biełaruski maršrut zusim nie aktualny.
Naściarožvaje i toje, jakimi kanałami išła hetaja infarmacyja.
Nie centralnaje niamieckaje vydańnie daje materyjał sa spasyłkaj na słužbovy dakumient Jeŭrakamisii. Rasijski sajt Inaśmi.ru apieratyŭna pierakładaje. Rasijskija sajty, aryjentavanyja na čytača «ŭ blizkim zamiežžy», apieratyŭna pieradrukoŭvajuć.
U vyniku dyskursu była zadadzienaja zusim inšaja akcentuacyja.
Usia hetaja historyja mnie trochi nahadała fejkavuju «spravu Lizy F.» — infarmacyjnuju śpiecapieracyju rasijskich śpiecsłužbaŭ, skiravanuju suprać reputacyi Jeŭropy ŭ cełym i kanclerki Mierkiel u pryvatnaści.
Ciažka skazać, ci mieła i ŭ našym vypadku miesca infarmacyjnaja śpiecapieracyja, ci prosta vypadkova nakrucili žurnalisty ŭ pahoni za siensacyjaj.
Kali mieła miesca śpiecapieracyja, to niajasna, ci była dadzienaja infarmacyja metava skinutaja žurnalistu «Tahiescajtunh» — haziety ź nievialikim nakładam, aryjentavanaj na levuju i zialonuju aŭdytoryju. Ci prosta infarmacyja stul była pa poŭnaj prahramie vykarystanaja dla stvareńnia infarmacyjnaj chvali.
My dasłali zapyt aŭtaru artykuła z «Tahiescajtunh», ale pakul nie atrymali ad jaho adkazu.
Moj vyvad: biełaruskim ŚMI varta praviarać i pierapraviarać nie tolki infarmacyju, tranślavanuju rasijskimi ŚMI, ale i ich akcentuacyju (zastaŭki, zahałoŭki).