Mitrapalit Pavieł: Dziaržava siońnia padtrymlivaje carkvu ŭ jaje patryjatyčnych inicyjatyvach
Pasłańnie da Raždžastva Chrystovaha mitrapalita Minskaha i Zasłaŭskaha Paŭła, Patryjaršaha Ekzarcha ŭsiaje Biełarusi, archipastyram, pastyram, dyjakanam, manacham i ŭsim viernym dzieciam Biełaruskaj Pravasłaŭnaj Carkvy.
Chvalicie Hospada, usie narody,
prasłaŭlajcie Jaho, usie plamiony:
bo vialikaja miłaść Jaho da nas,
i iścina Haspodniaja tryvaje viečna.
(Ps. 116, 1-2)
Uźlublenyja ŭ Hospadzie Praaśviaščennyja archipastyry, pačesnaje śviatarstva, u Chryście dyjakanstva, bohalubivy manaski čyn, darahija braty i siostry!
Sardečna, sa śvietłaj radaściu vitaju vas i vinšuju z najvialikšaj spasicielnaj padziejaj: pryšeściem u śviet Sonca Praŭdy — Chrysta, Boha našaha: «Słova stała płoćciu, i žyło siarod nas, poŭnaje błahadaci i iściny» (In. 1, 14). Lubiačy Svajo stvareńnie, Stvaralnik i Spasiciel naš Chrystos-Boh staŭ čałaviekam, va ŭsim padobnym da nas, akramia hrachu (hł. 1 Cim. 3, 16; Jaŭr. 4, 15). Haspodź prynios zabłudnamu čałaviectvu najvialikšy z usich daroŭ — Svaju Božuju luboŭ, kab spaści śviet, vyzvalić čałavieka ad strachu śmiarotnaha i ad samoj śmierci, daravać paŭnatu byćcia ŭ Bohu i žyćcio viečnaje kožnamu, chto pačuje zaklik Božy i pojdzie za Im.
U svaim pasłańni apostał Pavieł źviartajecca da karynfskich chryścijan, a značyć, i da kožnaha z nas, z adnym z takich zaklikaŭ: «Prasłaŭlajcie Boha i ŭ ciełach vašych, i ŭ dušach vašych, jakija naležać Bohu» (1 Kar. 6, 20). Hałoŭny sens hetaha zakliku zaklučajecca ŭ tym, kab my nie tolki dziakavali Bohu i ŭznosili Jamu chvału ŭ malitvach i piesnapieńniach, ale i prynosili dobry płod — spravy lubovi i miłasernaści na słavu Božuju, na karyść Carkvy, na karyść Baćkaŭščyny i na karyść bližniaha, niesučy «ciažary adzin adnaho» (Hał. 6, 2) — i ŭ radaści, i ŭ hory.
Haspodź zapaviedaŭ nam lubić adzin adnaho, zachoŭvać adzinstva carkoŭnaje, nieści ludziam mir Chrystoŭ i dabro, być łahodnymi i ciarplivymi, być ruplivymi ŭ malitvie i ŭ słužeńni słabym i abiazdolenym. «Pa tym paznajuć usie, što vy Maje vučni, kali luboŭ budziecie mieć pamiž saboju» (In. 13, 35), — kaža nam Haspodź i Spasiciel naš Iisus Chrystos. Dałučajučysia da hetaj usiedaskanałaj Božaj lubovi, my zdabyvajem niepieramožnuju zbroju «suprać złych duchaŭ padniabiesnych» (Ef. 6, 12), zdabyvajem mahčymaść paśpiachova supraćstajać usim vyklikam času. Jakija b spakusy i vyprabavańni ni spaścihali nas u hetym žyćci, słovy Hospada: «Ja z vami va ŭsie dni da skančeńnia vieku» (Mt. 28, 20) usialajuć u nas nadzieju, što Jon nie pakidaje nas siońnia i nie pakinie ŭ budučy čas.
Zakon lubovi, zavieščany nam Spasicielem, lažyć u asnovie sapraŭdnaha «adzinstva duchu» (Ef. 4, 3). Hety zakon — asnova hramadskaha žyćcia i salidarnaści, supolnaj stvaralnaj pracy i supracoŭnictva na słavu Božuju i na radaść tym, chto pieražyvaje roznyja biedy i niaščaści, chto cierpić niahody i maje patrebu ŭ našaj dapamozie i padtrymcy. Ale sapraŭdnaje jadnańnie naroda nie moža abmiažoŭvacca tolki časam vyprabavańniaŭ, jano pavinna stać nieadjemnaj častkaj našaj chryścijanskaj samaśviadomaści i sapraŭdnaha chryścijanskaha žyćcia.
Znoŭ nadyšło śvietłaje śviata Raždžastva Chrystovaha, śviata haračaj viery i niepasaromlenaj nadziei na Promysł Božy, jaki viadzie da dabra kožnaha čałavieka. Znoŭ raskryvajecca nieba nad ziamloju, znoŭ čujecca anhielskaje słavasłoŭje, jakoje abviaściła śvietu «radaść vialikuju, jakaja budzie ŭsiamu narodu: naradziŭsia vam siońnia ŭ horadzie Davidavym Spasiciel» (Łk. 2, 10-11). Razam z anhiełami my znoŭ zaklikajemsia zaśpiavać słavasłoŭje Dziciatku Chrystu, Jaki naradziŭsia, i, uklenčyŭšy pierad Im, jak heta zrabili ŭschodnija mudracy, prynieści ŭ dar «fimijam» sardečnaj malitvy, «zołata» dobrych spraŭ na słavu Carkvy i na karyść bližniaha, «mira» achviarnaha słužeńnia bližnim, i, prypaŭšy da jaślaŭ Chrystovych, jak viflejemskija pastuchi, słavić i chvalić «Boha za ŭsio, što pačuli i ŭbačyli».
Praaśviaščennyja archipastyry, darahija ajcy, braty i siostry, minuły hod byŭ niaprostym dla mnohich z nas, ale, miłaściu Božaj, jon prynios nam i niamała duchoŭnaj radaści. Jon byŭ adznačany šmatlikimi važnymi padziejami ŭ žyćci našaj Carkvy. U minułym hodzie va ŭsich jeparchijach archijerei z kliram, bracijaj i pastvaj zajmalisia vyrašeńniem nadzionnych pytańniaŭ carkoŭnaha žyćcia: dobraŭparadkavańniem jeparchijalnaj i prychodskaj dziejnaści, stvareńniem jakasna novych prychodaŭ, jakija zaklikany stać sapraŭdnymi pravasłaŭnymi abščynami, zdolnymi da aktyŭnaha ŭdziełu ŭ carkoŭnaj misii, z uklučeńniem u ich samaj aktyŭnaj siły hramadstva — moładzi; šmat uvahi nadavałasia raźvićciu sacyjalnych i aśvietnickich prajektaŭ Pravasłaŭnaj Carkvy.
U 2016 hodzie Biełaruskaja Pravasłaŭnaja Carkva i Dziaržava praciahnuli supolnuju pracu ŭ halinie achovy i zachavańnia historyka-kulturnaj spadčyny. Asablivaja ŭvaha nadajecca zachavańniu tradycyjnych kaštoŭnaściej biełaruskaha naroda, duchoŭna-maralnamu vychavańniu padrastajučaha pakaleńnia i prafiłaktycy niehatyŭnych źjaŭ i ich nastupstvaŭ u hramadstvie. U asnovu kultury i dziaržaŭnaści Biełarusi zakładzieny chryścijanskija kaštoŭnaści, jakija źjaŭlajucca samym viernym aryjenciram nie tolki ŭ žyćci chryścijanina, ale i asobnaha čałavieka. Dziaržava siońnia padtrymlivaje Carkvu ŭ jaje patryjatyčnych inicyjatyvach i propaviedzi nabožnaha ładu žyćcia.
Śviataja Pravasłaŭnaja Carkva zaklikaje kožnaha z nas staranna pracavać nad ačyščeńniem i praabražeńniem svajoj dušy, bo duchoŭnaja pieramiena samoha siabie — załoh i asnova dla praabražeńnia ŭsiaho naroda našaj Baćkaŭščyny.
Darahija i ŭźlublenyja ŭ Hospadzie Praaśviaščennyja archipastyry i pastyry, inaki i inakini, braty i siostry! Ad usiaho serca ź luboŭju ŭ Chryście znoŭ i znoŭ vinšuju ŭsich vas ź vialikim śviatam Raždžastva Chrystovaha i z Novym hodam miłasernaści Božaj. Malitoŭna žadaju vam dobraha zdaroŭja, mira, dabrabytu i nievyčerpnaj błahadatnaj dapamohi Božaj u vašych podźvihach i pracy na słavu Śviatoj Carkvy Chrystovaj, na karyść rodnaj Baćkaŭščyny i na karyść usich našych bližnich. Amiń.
+ PAVIEŁ,
mitrapalit Minski i Zasłaŭski,
Patryjaršy Ekzarch usiaje Biełarusi
Raždžastvo Chrystova
2016-2017 hh.,
horad Minsk