Biełaruskich bijatłanistaŭ źniali z mužčynskaj estafiety ŭ Paklucy
Zbornuju Biełarusi źniali z mužčynskaj estafiety 4ch7,5 km padčas honki 11 śniežnia na druhim etapie Kubka śvietu pa bijatłonie, jaki prachodzić u słavienskaj Paklucy, paviedamlaje BiełaPAN.
Na pieršym etapie estafiety za Biełaruś bieh Siarhiej Bačarnikaŭ, jaki zarabiŭ 6 štrafnych kruhoŭ i zaniaŭ apošniaje miesca pavodle vynikaŭ etapu z adstavańniem ad lidara 5 chvilin 6,1 siekundy. Bačarnikaŭ upaŭ na pieršym kruzie i paškodziŭ asnoŭnuju vintoŭku. Na ahniavych rubiažach jon stralaŭ z zapasnoj zbroi.
Na druhim etapie za Biełaruś bieh Uładzimir Čapielin, jon spraviŭsia sa stralboj značna lepš — nivodnaha štrafnoha kruha i ŭsiaho adzin dadatkovy patron.
Tym nie mienš na treci etap zbornaja Biełarusi ŭžo nie vyjšła, zaniaŭšy ŭ vynikovym pratakole 22-je miesca.
Nižej za biełarusaŭ raźmiaścilisia kamandy Šviecyi i Karei, jakija byli dyskvalifikavanyja. Pieramahli ŭ honcy francuzy (0+7; 1.11.56,5), druhimi stali rasijanie (1+6; 15,7), trecimi finišavali niemcy (0+11; 21,5).