Kiraŭnik Pientahona zajaviŭ ab hatoŭnaści da praciahłaha supiernictva z Rasijaj
Dziejučy ministr abarony ZŠA Eštan Karter zajaviŭ, što ZŠA pavinny padtrymlivać mahčymaści dla supracoŭnictva z Rasijaj pa tych kirunkach, dzie intaresy dźviuch krain supadajuć, ale pry hetym paabiacaŭ, što Vašynhton budzie zaŭsiody abaraniać svaich sajuźnikaŭ i hatovy da doŭhaha supraćstajańnia z Maskvoj.
«Usio, što robiać Złučanyja Štaty, jak samastojna, tak i ŭ składzie NATA, harantuje, što my praciahniem supraćstajać rasijskaj ahresii i my hatovyja da praciahłaha supiernictva», — zajaviŭ Karter na forumie pa biaśpiecy ŭ Kalifornii, paviedamlaje RBK sa spasyłkaj na CNN.
«My nie imkniomsia bačyć u Rasii voraha. Ale nie varta ciešyć siabie, my budziem abaraniać našych sajuźnikaŭ, śvietaparadak, zasnavany na ćviordych pryncypach, i śvietłuju budučyniu, jakuju jon nam usim zabiaśpiečvaje», — udakładniŭ kiraŭnik Pientahona.
Karter vykazaŭ upeŭnienaść, što NATA i ŭ budučyni budzie mieć vyrašalnaje značeńnie dla zabieśpiačeńnia kalektyŭnaj abarony pierad tvaram jak novych pahroz, tak i tych, što viarnulisia ź minułaha. Jon acharaktaryzavaŭ dziejańni Rasii ŭ Siryi jak kontrpraduktyŭnyja, a taksama abvinavaciŭ Maskvu ŭ nahniatańni jadziernaj pahrozy i ahresiŭnych namieraŭ u dačynieńni da Ukrainy i krain Prybałtyki.
Jon jašče raz pavinšavaŭ hienierała Džejmsa Mecisa z vybaram jaho kandydatury na pasadu ministra abarony ŭ administracyi Donalda Trampa i paćvierdziŭ hatoŭnaść zabiaśpiečyć płyŭny pierachod ułady ŭ viedamstvie. Raniej kiraŭnik Pientahona aficyjna zajaŭlaŭ, što vielmi vysoka cenić zasłuhi i prafiesijnyja jakaści Mecisa.
U chodzie pieradvybarčaj kampanii abrany prezident ZŠA Donald Tramp nieadnarazova krytykavaŭ dziejańni sajuźnikaŭ pa NATA i abiacaŭ pierahladzieć adnosiny ź imi. «Albo jany nam vypłaciać usio, što niedapłacili raniej, albo chaj vymiatajucca», — skazaŭ padčas adnaho z vystupaŭ Tramp. «Kali NATA razvalicca, to chaj razvalicca», — dadaŭ jon tady.
U lipieni 2016 hoda Donald Tramp taksama zajaviŭ, što nie ŭpeŭnieny ŭ tym, što hatovy aŭtamatyčna padaŭžać harantyi dla sajuźnikaŭ. Jon skazaŭ, što ZŠA buduć «prykryvać śpiny» svaich sajuźnikaŭ pa NATA, tolki «kali jany vykonvajuć svaje abaviazacielstvy» ŭ adnosinach da ZŠA.