U Minskim rajonie mužčyna sprabavaŭ padpalić supracoŭnic pradpryjemstva, dzie pracuje jaho žonka
Kryminalnaja sprava za pahrozu zabojstvam raspačataja ŭ dačynieńni da žychara Minskaha rajona.
Jak paviedamili va UUS Minskaha abłvykankama, niekalki dzion tamu ŭ adnym ź sielskahaspadarčych pradpryjemstvaŭ Minskaha rajona adbyŭsia incydent, u vyniku jakoha mahli surjozna paciarpieć niekalki čałaviek.
Pavodle infarmacyi načalnika adździaleńnia achovy pravaparadku i prafiłaktyki Mačuliščanskaha adździeła milicyi Minskaha RUUS majora milicyi Andreja Badnarčuka, u dziažurnuju častku pastupiła paviedamleńnie ab tym, što na pradpryjemstvie mužčyna ablivaje rabotnikaŭ bienzinam i sprabuje padpalić. Supracoŭniki milicyi prybyli na miesca i zatrymali padazravanaha.
Vyśvietliłasia, što zatrymany źjaŭlajecca mužam adnoj z rabotnic pradpryjemstva. U hety dzień jon pryjšoŭ da jaje na pracu, kab pahavaryć pra adnaŭleńnie siamiejnych adnosin. Paśla nieadnarazovych niaŭdałych sprobaŭ viarnuć prychilnaść žonki mužčyna staŭ pahražać, što padpalić žančynu i siabie razam ź joj. Zatym ad pahroz pierajšoŭ da dziejańniaŭ. Pry sabie ŭ jaho była piacilitrovaja jomistaść ź bienzinam. Adkryŭšy jaje, mužčyna staŭ ablivać ludziej, jakija znachodzilisia ź im pobač. Tak, niekalki pracaŭnic pradpryjemstva, jakija sprabavali abaranić svaju siabroŭku, taksama trapilisia jamu pad ruku. Napałochanyja žančyny kinulisia biehčy, kali mužčyna dastaŭ zapałki. Napadnika zmahli spynić inšyja pracaŭniki pradpryjemstva. Jany i vyklikali milicyju.