U «Jeŭrabačańni-2017» voźmuć udzieł 43 krainy
U mižnarodnym konkursie pieśni «Jeŭrabačańnie-2017», jaki projdzie ŭ mai budučaha hoda ŭ stalicy Ukrainy - Kijevie, prymuć udzieł 43 krainy, paviedamlaje BiełTA sa spasyłkaj na aficyjny sajt mižnarodnaha piesiennaha konkursu.
Takaja ž kolkaść krain udzielničała ŭ konkursach 2008 i 2011 hadoŭ. Siarod udzielnikaŭ — Rumynija i Partuhalija, jakija viartajucca paśla hadavoj adsutnaści. Aŭstralija maje namier treci raz udzielničać u konkursie «Jeŭrabačańnie». U minułym hodzie na scenie ŭ Stakholmie aŭstralijka Demi Im zaniała druhoje miesca, a ŭ 2015-m u Vienie Haj Siebaśćian staŭ piatym.
Bośnija i Hiercahavina nie budzie ŭdzielničać u 2017 hodzie ŭ maštabnym piesiennym šou Jeŭropy pa pryčynie rearhanizacyi nacyjanalnaha viaščalnika.
Krainy — udzielnicy konkursu «Jeŭrabačańnie-2017»: Ałbanija, Armienija, Aŭstralija, Aŭstryja, Azierbajdžan, Biełaruś, Bielhija, Bałharyja, Charvatyja, Kipr, Čechija, Danija, Estonija, Finlandyja, Francyja, Hiermanija, Hruzija, Hrecyja, Vienhryja, Isłandyja, Irłandyja, Izrail, Italija, Łatvija, Litva, Makiedonija, Malta, Małdova, Čarnahoryja, Niderłandy, Narviehija, Polšča, Partuhalija, Rumynija, Rasija, San-Maryna, Sierbija, Słavienija, Ispanija, Šviecyja, Šviejcaryja, Ukraina, Vialikabrytanija.
Paŭfinały konkursu pieśni «Jeŭrabačańnie-2017» adbuducca 9 i 11 maja, finał — 13 maja.
U 2017 hodzie «Jeŭrabačańnie» projdzie ŭ stalicy Ukrainy. Kijeŭ prymaŭ užo konkurs u 2005 hodzie, a taksama dziciačaje «Jeŭrabačańnie» ŭ 2009 i 2013 hadach. Mižnarodny vystavačny centr, jaki vybrany miescam praviadzieńnia konkursu, źmiaščaje da 11 tys. hledačoŭ. Infarmacyja pra kvitki budzie abjaŭlenaja ŭ chutkim časie.