Šerman, Bahuševič, Adamovič — prajšoŭ «Viečar troch premij»
Uviečary 25 kastryčnika ŭ minskim Pres-kłubie prajšło ŭručeńnie premii imia Karłasa Šermana za najlepšuju pierakładnuju knihu 2015 hoda.
Suzasnavalniki premii - Sajuz biełaruskich piśmieńnikaŭ, Biełaruski PEN-centr i Dabračynny fond «Viartańnie».
Premija niezdarma nosić imia Karłasa Šermana. Šerman, jaki naradziŭsia va Uruhvai, pierakładaŭ ź ispanskaj na biełaruskuju, byŭ zasnavalnikam i vice-prezidentam biełaruskaha PEN-centru. Darečy, premija ŭručałasia mienavita ŭ dzień narodzinaŭ Karłasa Šermana.
Karłas Šerman (1934-2005)
Usiaho sioleta na konkurs była dasłanaja 21 kniha. Ich pierakłali z 8 moŭ 34 pierakładčyki i vydali 7 vydaviectvaŭ. U karotki śpis uvajšli šaściora: Pavieł Kaściukievič ź pierakładam z anhlijskaj movy knihi Duhłasa Adamsa «Aŭtaspynam pa hałaktycy» (Łohvinaŭ); Francišak Korzun ź pierakładam z anhlijskaj movy knihi Kłajva Stejpłza Ljuisa «Listy Kruciala» (Halijafy); Jakub Łapatka ź pierakładam ź finskaj movy knihi «Kalevała» (Źmicier Kołas); Aleś Piatkievič ź pierakładam z polskaj movy knihi Siarhieja Piasieckaha «Baham nočy roŭnyja» (TAA «Hajsak»); Siarhiej Smatryčenka ź pierakładam z češskaj movy knihi Iržy Kratachviła «Lažać, šelma!» (Łohvinaŭ); Julija Smatryčenka ź pierakładam z češskaj movy knihi Patryka Oŭržednika «Jeŭrapieana. Karotkaja historyja dvaccataha stahodździa» (Łohvinaŭ).
Andrej Chadanovič maderavaŭ viečar i śpiavaŭ pieśni
Vybirali pieramožcu Lavon Barščeŭski, Źmicier Kołas, Uładzimir Papkovič, Andrej Chadanovič i Jula Cimafiejeva. Na dumku žury, najlepšym pierakładčykam minułaha hoda byŭ Jakub Łapatka, jaki pierakłaŭ na biełaruskuju znakamity finski epas.
Jakub Łapatka
Pieramožca taksama atrymaŭ ček ad Fondu «Viartańnie» na sumu ŭ 3900 rubloŭ.
Pradstaŭnik fonda «Viartańnie» Siarhiej Makarevič uručyŭ pieramožcu admysłovuju kartku dla atrymańnia hrošaj.
«Kalevału» ja pierakłaŭ ad złości. Adzin čałaviek mnie skazaŭ kaliści — što za mova takaja, biełaruskaja, kali na joj niama kłasikaŭ, naprykład, Siervantesa? Ja razzłavaŭsia. Spačatku ja ŭziaŭsia za Siervantesa… ale «nie pasiabravaŭ» ź im. A voś z «Kalevałaj» atrymałasia», — skazaŭ Jakub Łapatka.
Akramia taho, uručyli jašče dźvie premii. Biełaruski PEN-centr uznaharodziŭ premijaj imia Franciška Bahuševiča Śviatłanu Marozavu, daśledčycu z Hrodna, za knihu «Svajoj viery łamać nie budziem», i Dzianisa Lisiejčykava, namieśnika dyrektara Nacyjanalnaha histaryčnaha archiva, za knihu «Śviatar u biełaruskim socyumie: prasapahrafija ŭnijackaha duchavienstva 1596-1839 hh.».
Śviatłana Marozava.
Abiedźvie knihi pryśviečanyja daśledvańniu ŭnijackaj carkvy ŭ Biełarusi.
Dzianis Lisiejčykaŭ.
A premiju imia Alesia Adamoviča atrymaŭ Uładzimir Arłoŭ za knihu «Imiony svabody». U «Imionach…» Arłoŭ namalavaŭ partrety troch socień viadomych i nie vielmi biełarusaŭ, jakija zmahalisia za svabodu Biełarusi.
Uručyć premiju Arłovu «dapamoh» Uładzimir Niaklajeŭ.