U Nacyjanalnym aeraporcie adkryŭsia łahistyčny centr pa apracoŭcy mižnarodnaj pošty
17 kastryčnika na terytoryi Nacyjanalnaha aeraporta Minsk adbyłosia ŭračystaje adkryćcio łahistyčnaha centra pa apracoŭcy mižnarodnaj pošty RUP «Biełpošta», u jakim byli pradstaŭleny najnoŭšyja technałahičnyja rašeńni pryjomu, apracoŭki i padačy na mytny dahlad mižnarodnych paštovych adpraŭleńniaŭ.
Jak paviedamlajecca na sajcie aeraporta, u novym modulnym budynku z vytvorčaj płoščaj bolš za 1,5 tysiačy kvadratnych mietraŭ budzie apracoŭvacca mižnarodnaja pošta, jakaja pastupaje ŭ Biełaruś pavietranym šlacham. Łahistyčny centr asnaščany sučasnym abstalavańniem, intehravanym ź mižnarodnaj sistemaj IPS centra paštovych technałohij Suśvietnaha paštovaha sajuza i infarmacyjnaj sistemaj RUP «Biełpošta». U centry vykarystoŭvajecca kambinavanaja transpartnaja sistema z arhanizacyjaj na pracoŭnych miescach maksimalna mahčymaj miechanizacyi i aŭtamatyzacyi technałahičnych pracesaŭ apracoŭki uvachodnaj mižnarodnaj pošty.
Łahistyčny centr ažyćciaŭlaje apracoŭku i mytnaje afarmleńnie, mižnarodnych paštovych adpraŭleńniaŭ, jakija pastupajuć u Biełaruś avijatranspartam, siem dzion na tydzień, kruhłasutačna, a heta na siońniašni dzień dazvalaje aptymizavać terminy apracoŭki ŭvachodnych mižnarodnych paštovych adpraŭleńniaŭ i paskarać ich dastaŭku atrymalnikam. Terminy apracoŭki aptymizujucca da adnaho-dvuch dzion.
Za dzieviać miesiacaŭ z ahulnaha abjomu ŭvachodnych mižnarodnych adpraŭleńniaŭ z tavarnym układańniem u łahistyčnym centry apracavana kala troch miljonaŭ adpraŭleńniaŭ, abo bolš za 30% ad ahulnaj kolkaści.
Taksama za nazvany pieryjad z pačatku hoda mytniaj «Minsk-2» pry kantroli mižnarodnych paštovych adpraŭleńniaŭ spyniena piać złačynstvaŭ, źviazanych ź niezakonnym uvozam u respubliku narkatyčnych i psichatropnych rečyvaŭ; vyjaŭlena 14 administracyjnych parušeńniaŭ, źviazanych ź pierasyłkaj lekavych preparataŭ, jakija źmiaščajuć psichatropnyja rečyvy; 46 sprob niezakonnaj pierasyłki nasieńnia raślin, jakija vykarystoŭvajucca jak syravina dla vytvorčaści narkotykaŭ; kanfiskavana bolš za 530 štuk nasieńnia kanapiel i spor halucynahiennych hryboŭ; spyniena 12 sprob pieramiaščeńnia častak ahniastrelnaj zbroi i chałodnaj zbroi i 17 faktaŭ niezakonnaj pierasyłki kulturnych kaštoŭnaściaŭ, siarod jakich maniety, paštovyja marki, hrašovyja banknoty, dekaratyŭnyja talerki, rarytetnyja drukavanyja vydańni.