Kačyński zhodny na ekshumacyju cieła brata
Eks-premjer Polščy, lidar partyi «Prava i spraviadlivaść» Jarasłaŭ Kačyński zajaviŭ, što zhodny na ekshumacyju cieła svajho brata-bliźniuka — zahinułaha ŭ avijakatastrofie pad Smalenskam u krasaviku 2010 hoda prezidenta Polščy Lecha Kačyńskaha, paviedamlajuć infarmacyjnyja ahienctvy.
Jarasłaŭ Kačyński ličyć skandalnym praviedzienaje raniejšym uradam rasśledavańnie trahiedyi. Na jaho dumku, «mnohija ludzi pavinny sieści za heta na łavu padsudnych».
Aficyjnaja delehacyja Polščy na čale z prezidentam respubliki Lecham Kačyńskim 10 krasavika 2010 hoda lacieła na ŭradavym samalocie ŭ Katyń. Avijałajnier raźbiŭsia, nie daciahnuŭšy da ŭźlotna-pasadačnaj pałasy aeradroma Smalensk-Paŭnočny. Usie 96 čałaviek, jakija znachodzilisia na borcie, zahinuli.
Abstaviny hetaj trahiedyi vyvučaje abnoŭlenaja kamisija pa rasśledavańni avijazdareńniaŭ, arhanizavanaja Ministerstvam abarony Polščy. Niekalki miesiacaŭ tamu pryniataje rašeńnie ekshumavać cieły achviaraŭ krušeńnia, kab pravieści ŭsiebakovyja patołahaanatamičnyja daśledavańni ŭ halinie taksikałohii i DNK z vykarystańniem kampjutarnaj tamahrafii. Na dumku śpiecyjalistaŭ, heta dapamoža vyznačyć pryčyny śmierci achviar krušeńnia avijałajniera, adnavić chod katastrofy i jaje pryčyny.
Z nahody ekshumacyi cieł achviar avijakatastrofy mierkavańni blizkich zahinułych roznyja: adny nie chočuć parušać spakoj pamierłych, inšyja nastojvajuć na praviercy. Zhodna z zakanadaŭstvam Polščy, ekshumacyja moža pravodzicca ŭ pieryjad z 15 kastryčnika da 15 krasavika.