Parašenka vystaviŭ Rasii asnoŭnyja patrabavańni nakont Danbasa
Prezident Ukrainy Piatro Parašenka na sustrečy Jałcinskaj jeŭrapiejskaj stratehii vysunuŭ klučavyja patrabavańni da Maskvy. Pavodle jaho słoŭ, pakul Kreml ich nie vykanaje, Ukraina nie stupić i kroku da vykanańnia Mienskich damoŭlenaściej.
AP
Pa słovach kiraŭnika ŭkrainskaj dziaržavy, patrebna «darožnaja karta» z paśladoŭnaściu krokaŭ.
«Rasija pavinna zabiaśpiečyć pastajannaje pieramirje na Danbasie. Spynić pastaŭlać svaju ciažkuju artyleryju, tanki, rehularnyja vojski na terytoryju Ukrainy. Zabiaśpiečyć narešcie bieśpieraškodny dostup naziralnaj misii ABSIE na ŭsiu terytoryju Danbasa i Kryma i na časova niekantralavanuju častka ŭkrainska-rasijskaj miažy», - zapatrabavaŭ Parašenka.
«Paŭtaraju raz i nazaŭždy. Adnojčy my ŭžo padstavili druhuju ščaku, i ŭ vyniku ledź zastalisia žyvyja. Chopić. Bolš [z našaha boku] nie budzie nijakich krokaŭ da taho času, pakul rasijski bok nie projdzie svaju dystancyju na šlachu da biaśpieki», — zajaviŭ ukrainski prezident. Jon taksama zaklikaŭ da vyzvaleńnia palityčnych źniavolenych.
Jałcinskaja jeŭrapiejskaja stratehija — štohadovaja mižnarodnaja kanfierencyja ukrainskich i zamiežnych palitykaŭ i pradprymalnikaŭ. Z 2004 pa 2014 hod jana prachodziła ŭ Livadzijskim pałacy pad Jałtaj, a paśla anieksii Rasijaj paŭvostrava štohadovyja sustrečy pravodziacca ŭ Kijevie.
Na ciapierašniaj kanfierencyi ukrainski lidar pramaŭlaŭ pa-anhlijsku.