Na adnym poli ŭ Słonimskim rajonie ŭ administracyi dobry ŭradžaj bulby, a ŭ prostych sialan zamiest jaje vyras burjan VIDEA
U redakcyju «Haziety Słonimskaj» źviarnulisia žychary vioski Hrynka Słonimskaha rajona.
Niezadavolenyja viaskoŭcy narakajuć na toje, što za pasadku bulby, jakuju na siale vyroščvajuć kalektyŭna na adnym poli, adzin čałaviek za dzialanku zapłaciŭ prykładna pa 700-800 tysiač rubloŭ.
Ludzi stajać na bulbianym poli ŭ vioscy Hrynka
Dla prostaha viaskoŭca heta niemałyja hrošy. A voś ŭradžaj, pa ŭsioj bačnaści, budzie tolki ŭ staršyni i jaho atačeńnia. Mienavita tak adznačajuć žychary vioski Hrynka.
Pieršaje, čym niezadavolenyja žychary, tak heta miescam pasadki, jakoje abrała dla ich kiraŭnictva kałhasa.
— Zhodna z čarhoj, našyja dzialanki na pole pavinny byli być u pačatku pola, ale ich čamuści zaniaŭ staršynia i administracyja haspadarki. Taksama SVK pavinien byŭ apracoŭvać pali chimičnymi srodkami suprać pustaziella i škodnikaŭ. Tolki voś čamuści dzialanki, dzie pasadžanaja bulba žycharoŭ vioski Hrynka, paraśli burjanom.
Vychodzić, jany nie apracavanyja. U toj ža čas ŭčastki administracyi haspadarki i staršyni idealna dahledžanyja.
«Niaŭžo dla nas nie chapiła hetaj chimii? Bo my ž za hetuju pasłuhu zapłacili, jak i ŭsie», — niezadavolena zajaŭlajuć viaskoŭcy.
Naprykład, jak patłumačyŭ karespandentu «HS» viaskoviec Piotr Ivanavič Mialeška, usie pytańni pierad pasadkaj bulby jany ŭzhadniali sa staršyniom SVK «Družba-Ahra». I pytańniaŭ nie ŭźnikała.
— Prychodzić čas źbirać bulbu, a karaniapłodaŭ u nas praktyčna niama, — kaža mužčyna.
— A vy źviartalisia da staršyni z hetym pytańniem?
— Tak. Jon nam skazaŭ, što nad našymi sotkami prajšli daždžy, tamu ŭ nas nieŭradžaj.
— A čamu vaša miesca pa čarhovaści raźmiaščeńnia učastkaŭ zaniaŭ staršynia. Jon vam rastłumačyŭ?
— Jon skazaŭ, što tak atrymałasia …
Piotr Ivanavič Mialeška kaža, što doŭhi čas prapracavaŭ u kałhasie i dobra viedaje hetyja pali. Kaža, što na dzialankach, jakija im adviali, pravodziłasia mielijaracyja, tamu na ich vyraścić dobry ŭradžaj bulby budzie składana.
Karespandent pasprabavaŭ vyśvietlić situacyju, jakaja skłałasia ŭ kiraŭnictva SVK «Družba-Ahra» i nabraŭ numar telefona (029) 669-45-92 staršyni.
Na zvanok adkazaŭ mužčyna. Jon nie zachacieŭ pradstavicca, ale achvotna prakamientavaŭ pytańnie nakont pretenzijaŭ ludziej:
— Usie dakumienty pa apracoŭcy pola ŭ nas majucca, kali chočacie, možacie pryjazdžać sfatahrafavać dla vašaha materyjału. My svaju zadaču vykanali, ludzi mohuć pryjazdžać i źbirać bulbu.
— Ale žychary vioski Hrynka narakali taksama na toje, što čarha pasadki bulby nie była vykananaja, kažuć, što ich miesca zaniaŭ staršynia. Što z hetaj nahody možacie skazać?
— Čarha była vykananaja, a da vas źviarnulisia piensijaniery, jakija i nie viedajuć, dzie ich sotki znachodziacca.