Niamieckija ŭłady chočuć adpraŭlać biežancaŭ nazad u Hrecyju
Ministr unutranych spraŭ FRH Tomas de Meźjer (Thomas de Maizière) zajaviŭ pra namier u dalejšym adpraŭlać biežancaŭ nazad u Hrecyju, kali heta była dla ich pieršaja kraina ŭjezdu ŭ ES.
«My ŭ Jeŭropie šmat zrabili dla taho, kab palepšyć situacyju ŭ Hrecyi», — zajaviŭ de Meźjer u intervju haziecie Welt am Sonntag. Na dumku palityka, heta pavinna pryvieści da peŭnych vynikaŭ.
fota Rojterz
Pry hetym kiraŭnik MUS udakładniŭ, što vielmi važna pryjści da ahulnajeŭrapiejskaha punktu hledžańnia.
«Kali my budziem zabiahać napierad, źjavicca niebiaśpieka, što siudy chutka zabaroniać adpraŭlać biežancaŭ nazad», — zajaviŭ de Meźjer.
U suviazi z vysokaj kolkaściu prybyłych biežancaŭ u 2015 hodzie de Meźjer vysunuŭ u adras Hrecyi surjoznyja abvinavačvańni.
Pavodle jaho słoŭ, na źniešniaj miažy ES varta było naładzić rehistracyju mihrantaŭ i spynić praktyku «miechaničnaha adabreńnia» ŭsich zajavak.
«U hetym vypadku Vienhryi nie daviałosia b vybudoŭvać płot na miažy», — dadaŭ ministr. U toj ža čas de Meźjer pierakanany, što zakryćcio niamieckaj miažy ŭ hetaj situacyi nie vyrašyła b prablemu napłyvu biežancaŭ u Niamieččynu.
Dublinskaja damova pa ŭciekačach praduhledžvaje, što za kožnaha asobnaha biežanca niasie adkaznaść taja kraina-člen ES, u jakuju mihrant traplaje ŭ pieršuju čarhu. Vydača biežancaŭ z FRH u Hrecyju była prypynienaja jašče ŭ 2011 hodzie — nie ŭ apošniuju čarhu praz adsutnaść u Afin vybudavanaj sistemy pa pryjomie mihrantaŭ.
Pry hetym kiraŭnik MUS nie ličyć, što mihracyjnaja palityka niamieckich uładaŭ zhulała na ruku antyisłamskaj partyi «Alternatyva dla Hiermanii», čyja papularnaść pačała raści ŭ pieryjad aktyŭnaha prytoku biežancaŭ. Pavodle jaho słoŭ, rost aktyŭnaści pravych papulisckich partyj nazirajecca pa ŭsioj Jeŭropie.