Kanstancinopalski patryjarchat: Majem prava davać aŭtakiefaliju pravasłaŭnym byłoj Rečy Paspalitaj biez zhody Maskvy
Terytoryja Ukrainy — kananičnaja terytoryja Kanstancinopalskaj Carkvy, adznačyŭ pradstaŭnik Kanstancinopalskaha Patryjarchatu arcybiskup Ioŭ (Hieča) u intervju risu.org.ua.
«U historyi ŭsie novyja Pravasłaŭnyja Cerkvy da našych dzion — heta byłyja terytoryi Suśvietnaha Patryjarchatu, jakim jon davaŭ aŭtakiefaliju. I pa kananičnych pryčynach Suśvietny Patryjarchat maje ŭ pravasłaŭnym śviecie pieršaje miesca», — zajaviŭ ijerarch.
Pa pryčynie isnavańnia Kijeŭskaj mitrapolii, jakaja abjadnoŭvała ŭsich pravasłaŭnych Rečy Paspalitaj, Kanstancinopal daŭ biez zhody Maskoŭskaha Patryjarchatu aŭtakiefaliju Polskaj Pravasłaŭnaj Carkvie ŭ 1924 hodzie.
Kijeŭskaja mitrapolija była niepasredna padparadkavana Kanstancinopalu da kanca 17 stahodździa, kali Maskoŭskaje carstva zachapiła Kijeŭ.
«Na asnovie čaho byŭ dadzieny Tomas u 1924 hodzie Polskaj Pravasłaŭnaj Carkvie? Kanstancinopal razhladaŭ Polskuju Carkvu jak byłuju častku Kijeŭskaj mitrapolii. Jak my viedajem, pry mitrapalicie Cypryjanie Cambłaku Kijeŭskaja mitrapolija znachodziłasia ŭ miežach polska-litoŭskaj dziaržavy, to bok jaje miežy pašyralisia i na terytoryju Polščy, i na Litvu», — skazaŭ archibiskup.
Tomas — pastanova pradstajaciela pamiesnaj pravasłaŭnaj carkvy na niejkim važnym pytańni carkoŭnaj arhanizacyi. U tym liku Tomas moža davać častcy carkvy pravy aŭtanomii (častkovaha samakiravańnia) ci aŭtakiefalii (poŭnaha samakiravańnia).
Sa słoŭ arcybiskupa zrazumieła, što kananičnaj terytoryjaj Kanstancinopalskaha Patryjarchatu ličycca i Biełaruś jak byłaja častka Vialikaha Kniastva Litoŭskaha, jakaja taksama ŭvachodziła ŭ Kijeŭskuju pravasłaŭnuju mitrapoliju.
«Kali ŭ 1924 hodzie Kanstancinopal daravaŭ aŭtakiefaliju Polskaj Carkvie na hruncie Kijeŭskaj mitrapolii, čamu siońnia Kanstancinopal nie mieŭ by prava dać samoj Kijeŭskaj mitrapolii stan aŭtakiefalii? Kali heta było mahčyma ŭ 1924 hodzie — heta mahčyma i siońnia», — zaklučaje ijerarch.