Łukašenka: Biełaruś i Iran adzinyja ŭ pohladach na śvietaparadak
«U nas tut niama nijakich prablem. My razumiejem adzin adnaho, u nas niama nijakich niedamoŭlenaściej».
«Što tyčycca našych palityčnych i dypłamatyčnych adnosin, u nas tut niama nijakich prablem. My razumiejem adzin adnaho, u nas niama nijakich niedamoŭlenaściej», — cytujuć kiraŭnika dziaržavy biełaruskija aficyjnyja krynicy. A.Łukašenka padkreśliŭ, što ŭvažliva stavicca da supracoŭnictva «ź siabrami ź Irana». Pavodle jaho słoŭ, Biełaruś hatova pavialičyć tavaraabarot ź Iranam da 1 młrd. dołaraŭ ZŠA.
«My damovilisia z prezidentam Irana, što hałoŭnaje ŭ našych adnosinach, padmurak supracoŭnictva — heta ekanamičnyja adnosiny. U pryvatnaści, my damovilisia ab inviestycyjach ŭ ekanomiki našych dziaržaŭ. Takim čynam, płany i kirunki dziejańniaŭ vyznačany, ciapier ich nieabchodna napaŭniać kankretnym źmiestam. Jak heta rabić, my taksama vyznačylisia. Ciapier my pavinny realizoŭvać zapłanavanaje», — skazaŭ A.Łukašenka.
Jon pazityŭna acaniŭ dynamiku biełaruska‑iranskaha handlova‑ekanamičnaha ŭzajemadziejańnia, adznačyŭšy, što tavaraabarot, jaki ŭ 2007 hodzie skłaŭ 80 młn. dołaraŭ, usio jašče niaznačny. Pavodle mierkavańnia A.Łukašenki, Biełaruś i Iran majuć značna bolšy patencyjał.
Ali Akbar Miechrabjan u pryvatnaści padkreśliŭ, što kiraŭnictva Irana nadaje vialikaje značeńnie raźvićciu ŭsiebakovych adnosin ź Biełaruśsiu. Ministr vysoka acaniŭ sustrečy i pieramovy va ŭradzie Biełarusi i pieradaŭ A.Łukašenku piśmovaje pasłańnie Machmuda Achmadziniežada, paviedamlajuć aficyjnyja krynicy.